Myen Balik ni Rubber pala gap sharin shaman
23, October 2008
Jinghpaw Mung, mare daju Myitkyina Muklum kata Myen Balik dap(5) hte post (11) nga ai kaw na Myen Balik ni hte Manmaw Muklum na Balik ni 21,Oct 2008 kaw nna Rubber pala gap sharin shamawn ai lam hte kasu kabrawng jang masha daw-tsa hpe hkang zing, rim na ladat ni hpe sharin shaman ai lam galaw nga sai lam Buga masha langai kawn chye lu ga ai.
Ndai lam hpe matut sagawn yu yang, Myen Mung kata na Myen Balik ni gaw ya ten hta Rubber pala gap sharin shakyang shaman nga ai lam chye lu ga ai. Ndai Rubber pala sinat ni hpe Russia ni garum jaw ai lam mung chye lu ga ai. Ndai zawn re ai lam gaw Myen Hpyen Asuya kaw nna Myen Mung Mungchying Uphkang Dap hpe madung tawn shagreng sa wa na masing masa jahkrat ai lam sha n-ga, Mare kaba de gaw Balik Dap hpe madung tawn, Bum ga de gaw Hpyen Dap hpe madung tawn wa ai re hpe chye lu ga ai.
Lam gaw n gram ya, Kang gaw hta sha
18,October 2008
Manmaw Ginwang, Manmaw - Namhkam lam ntsa na, Thi He hte Kapani mare lapran, Kawng Ja Yang mare na Chya-ri hka mahkrai ( Deng – 5 mahkrai) e, masha marai (20) ram ginsum gap, gate galaw nna kawa kan-dang langai jahkrat let kang hta sha nga ai lam buga masha langai kaw na chye lu ai.
Ndai zawn kang hta la ai gaw, lai malai mawdaw hte sengke ni hpe hta la nga ai lam chye lu ai. Sengke langai - 200, Htawla-gyi langai – 2000 – 4000, Hilux mawdaw langai – 4000 – 8000, Mawdaw kaba yang kaba ai hku – 10,000 mi lahta de hta la nga ai majaw lai hkawm lai sa buga masha ni mayak hkrum nga ai lam chye lu ai.
“Ndai lam hpe Asia World Company kaw na galaw ai re,nga tsun kajai nga ma ai, raitim ya gaw ‘Manmaw- Namhkam lam, mahkrai gram Hpung' nga nna sha pyen dau hta ka shakap da ma ai” nga nna Buga masha ni kawn shana wa ma ai. Ndai masing hpe 3 ning contract la dai sai lam hpe mung chye lu ai. Dai zawn re kang hta la ai ginsum (gate) hpe Man Je mare hte kade n tsan ai, Man Yu hte Nam Mahpoi lapran na, Man Yu mahkrai pawt e mung galaw da sai lam buga masha ni kaw na chye lu ai.
Ndai zawn rai kang hta ai lam hta lai malai yawng hpe adip arip rai hta nga ai majaw buga masha ni a lai wa lai sa lam hta grai myit dutdang ai hte yak nga ai lam hpe mung na chye lu ai. Mare langai hte langai shada htingbu wawm pyi yak nga ai nga nna buga masha ni tsun nga ma ai.
Kawng Shan mare na Shanglawt Manau
5, Oct.2008
2008 ning October shata praw (2-4) ya laman Miwa Gumsan mungdan, Yunan mungdaw, Nshawn ginwang, Kawng Shan mare e, Bu HKawm Makan Dap ni woi awn nna manau poi galaw ai lam buga masha langai kawn chye lu ai.
“ Ndai manau poi gaw Miwa Gumsan Mungdan a Shanglawt lu ai shaning (59) ning hpring masat hku nna woi galaw ai manau poi re ” nga nna dai ginra na salang langai mi tsun ai.
“ Bai nna, ndai Kawng Shan manau wang gaw, Miwa Gumsan Asuya Hpyen Dap hte Jinghpaw Wunpawng Amyu sha ni a shada myit hkrum lam makyit, mungdup la nna manau shawng nau hpang ai shara re; dai gaw 1952 ning March shata (12) ya e re. Dai shani kaw nna shaning shagu na Nshawn manau poi hpe Asuya ni nan shang lawm karum ya let, Nshawn Ginwang hpe mung Manau Buga Nshawn ngu shamying ya ma ai ”, ngu dai salang wa kaw na matut tsun lai wa sai.
Poi lamang hpe 2008 ning October praw (2) ya jahpawt Gindai ten hkying (10:00) aten hta, Nshawn Ginwang Hkalup Hpung masha ni a Sen Hkum hte hpang nna, Nshawn hte Ruili mare na Htunghking hpung ni a ka manawt lamang hte hpaw hpang nhtawm, manau bai matut manau ai lam chye lu ai.
Manau nau ngut ai hpang, htunghking ginsup shingjawng poi lamang ni matut galaw ai hta, kawa lahpaw gap shingjawng ai lam, mam htu shingjawng ai lam, kawa tawng htan nna shada n-gun ja shingjawng ai lam ni galaw nna, nu num gumgai ni a rid a maka da dan ai lamang hte Jinghpaw Wunpawng sha ni a rid a maka lawm ai bu hpun palawng ni, nta hkan lang ai arung arai ni hpe mung dut garan ya ai lam chye lu ai.
Bai nna, ndai Kawng Shan mare kaw shanu lai wa sai, Sara Shan gaw Karai mungga shawng nli jahkrat hpang, Jinghpaw Laika hpe sharin hpang ya ai sha n-ga, ndai ga e nga ai Wunpawng Amyu sha ni hpe zinlum nhtawm, Sak Hkung, Sam, Jinghpaw Madu Uphkang Mungdaw ngu masat lu hkra woi shakut let Miwa Gumsan Asuya hte myit hkrum manau shawng woi manau hpang lai wa sai lam mung chye lu ai.
Shaning shagu Nshawn manau poi hpe Miwa Asuya a shaning nnan hpang (15) ya a shawng daw hta galaw chye ma ai rai tim, ya 2008 ning hta ndai lang hte rai yang (3) lang ngu na manau nau sai lam chye lu ai.
(12) Lang na MGZ La Sharin Hpawng Namhkam e galaw
Sep. 23, 2008.
(12) lang na Mungmau Ginwang, La Sharin Hpawng hpe 2008 ning September shata (8 kawn 12) laman, Sammung, Namhkam mare, No. 1 Hkalup Hpung nawku jawng e galaw lai wa sai lam Buga masha ni kawn chye lu ai.
Ndai MGZ La Sharin Hpawng a madung gabaw gaw, “Hkristu hte shadawn ram ai gawng shingyan a lanang hkap lu hkra” ( Ehpesu. 4:13 ) ngu ai rai nna, sharin ya ai, sharin ginhpan ni hte sharin sara ni gaw;
1. Sharin Hpawng a Gabaw, Ehpesu. 4:13 hpe Rev. Labya De (Manmaw Ginwang Amu Madu )
2. Shinggyim kawa la hpe Karai Kasang hkang da ai lit hpe Rev. Gunhtang La Myen (Geis Masat Hpung Up, Myitkyina )
3. Makam masham the dinghku hpe lam woi ai kawa hpe Rev. Hpaugan Tang Gun (KBC La Hpa-awn )
4. Gawgap ai magam hta Madu myit ra ai lam sharin ya rit hpe Rev. Brang Nan ( MGZ Amu Madu )
5. Mahkawn hpe Hpauyam La Doi Bu ni lit la sharin ya ai lam chye lu ai.
Ndai la sharin hpawng hta Mungmau Ginwang, Buga Hpung (21) na Wa La ni marai (260) jan shang lawm let kabu gara galaw la ngut sai lam Buga Hpung masha langai kaw na chye lu ai.
Bss
Bum San Buga a Nawku Jawng Wang Hpe, N Htawt Sit Hkra Matut Makawp Maga
Sep,16, 2008.
2008 Ning September (15) ya, jahpawt hkying (9:30 am kawn 10:30 am) laman, Myen – Miwa ga jarit ginra, Muse mare makau, Mungyu (105) miles na Bum San buga hpung ni a nawku jawng wang htawt sit na lam hte seng nna, Ya – Ya - Ka rung e, Buga Hpung Komiti myitsu ni hte dai ginra na myen asuya magam gun ni, hkrum shaga ai lam buga masha langai kawn chye lu ai.
Lai wa sai, August (30) ya shani hta, seng ang ai ginra asuya mu gun ni kawn Buga Hpung Komiti ni hpe nawku jawng wang htawt sit na matu, sadi jaw shadut wa sai hte, September (15) ya shani hpang jahtum, Nawku Jawng Wang hpe htawt na, n htawt na lam hpe, mahtai bai jaw na matu matsun da ai majaw, ya na zawn bai hkrum shaga ai re lam chye lu ai.
Ndai zawn hkrum shaga ai ten, Buga Hpung Komiti ni kawn, laika hte tang madun ai lam hta;
1. Hkalup hpung ni a makam masham hte, hkan sa ra ai tara Lakchyoi buk, laika man (50), daw (10)hta, (Local Church Autonomy) Buga Hpung ni a awmdawm, madu uphkang lam nga ai ngu nna matsun da ai majaw, Myen Mung Hka Lup Hpung Ginjaw (MBC) a myit hkrum lawm ai hte sha gaw, anhte n lu htawt sit ai.
2. Lai wa sai, 2007 ning May shata (7) ya shani, Ga Jarit Sut Hpaga Gaiwang lithkam, Col. San Pyi kaw tang madun, hpyi shana lajin da ai hte maren, seng ang ai asuya magam dap Hkringmang ni kaw na, tara shang htawt sit shangun ai laika ra ai.
3. 1996 ning hta Ga Jarit Sut Hpaga Gaiwang Up, Col. Soe Yi wa nan “masing da ai shara kaw n hkra ai, dai majaw ngut hkra galaw la mu” ngu da ai hpe hpang daw na salang ni gaw, “dai ga tara n shang ai” ngu tsun nna htawt sit shangun wa ai, bai ya ang ai salang ni a ga hpe madat nna hkan galaw yang mung hpang e bai ang ai salang ni n chye lawm mat na hpe tsang ga ai. Dai majaw , n lu htawt sit ai, ngu ninghkap madi madun da ai lam buga masha ni kawn chye lu ai.
Ndai lam hte seng nna lai wa sai bat hta Bum Sumshi kawn KBC sara kaba ni hpe san yu yang, “ Buga Hpung gaw, (Local Church Autonomy) Buga Hpung ni a awmdawm, madu uphkang lam nga ai, dai majaw KBC, MBC ni gaw ndai lam dawdan ya na hta dai ram ahkaw ahkang n nga ai ”, “ bai nna asuya ni hku nna n htawt sit n mai nga nna shadut wa jang gaw, Buga Hpung a matu Lamu ga hte Nawku Jawng nan gap ya ngut ai hpang she, htawt sit yang mai kaja na re ”, ngu hpaji jaw tsun shana wa ma ai.
Ndai zuphpawng hta, Buga Hpung Komiti na marai (7) shang lawm nna, asuya ginwang daw sasana makan dap, Ningtau Lithkam Than Zaw Lat, Na – Sa - Ka lit hkam, Tin Aung Kyi, Ya – Ya - Ka Ningbaw, Htay Win ni hpe nawku jawng wang hpe n lu htawt sit ai lam laika hte tang shawn lai wa ai zawn, seng ang ai ni mung hkap la let, ntsa de matut nna, tang madun ya na matu myithkrum sai lam buga masha langai kawn chye lu ai.
Ndai lam hte seng nna matut na lu ai gaw, dai ga jarit Sut Hpaga Gaiwang kaw nna Nampakka du hkra asuya ni hku nna, Miwa Lauban ni hpe lamu ga dut sha kau sai majaw ya na zawn lajang wa ai re lam, ya lit ang ai asuya magam gun ni mung, n kam la tim tsun shakut ra ai lam, bai nna shanhte asuya magam gun ni hku nna myit da ai gaw tsa-lit, kumhpaw kumhpa hte sa tsun tawngban lajin wa na zawn nawn tim, laika hte chyu bai nhtang madi bun bun re majaw myit htum nga ma ai lam buga masha ni kawn chye lu ai. Dai majaw Mungyu (105) miles nawku jawng wang manghkang gaw, “asuya magam gun uhpung langai htawt wa shagu, gumhpraw lu na gabaw shatai wa re majaw, akyu hpyi let sha matut ninghkap makawp maga na matu dawdan da sai re” nga nna, buga hpung masha langai tsun wa ai.
BSS
(105) Miles na Bum San Nawku Jawng htawt kau na bai shadut hkrum
Sep.4, 2008
Lai wa sai 2008 ning August shata (30) ya shani hkying 1:30 aten hta Miwa ga jarit ginra rai nga ai, Mungmau Ginwang, (105) Miles na Bum San Buga Hpung ni a Nawku Htingnu hpe lawan htawt sit kau na matu dai ginra e ang nga ai, Na – Tsa – Ka Ningtau Matsun Du, Maj. Than Win hte Muse Ginwang Sasana Makan Dap na Ningtau Lithkam, Slg. Than Zaw Lat yan kawn Buga Hpung Komiti ni hpe wa shadut ai lam buga masha langai kaw na chye lu ai.
Ndai Nawku Htingnu gaw Nawku Hpung de ai, (25) Ning Masat hku nna gawgap let 2001 Ning March (25) ya hta Dingshawn Shang nhtawm, Dung Hkan, (105) Miles Mung Yu, Maw Tawng, Da Lung ndai mare (4) na Hpung masha (800) ram bat shagu nawku daw jau nga ai Nawku Jawng re. Galu de pe – 76 , dam de pe – 50, bai nna Dingsi langchyi gaw galu de pe – 24, dam de pe – 10, rai nna lamu ga gaw galu de pe- 450, dam de – 150 kaba ai re.
“Ya lang na zuphpawng hta, ‘ lamu ga hte Nawku jawng a matu Lap Sen- (170) hte pe – 200 sq. dam ai lamu ga tam ya na; hkap la na, n hkap la na hpe du wa na, 2008ning September (15) ya jahpawt hkying (9:00) aten hta bai shana wa marit, ndai lamu ga gaw Tar – Moe – Nye –Pyi –Thu – Sit ni hpe jaw kau sai,' ngu Maj. Than Win hte Slg. Than Zaw Lat yan kawn Buga Hpung Komiti ni hpe wa shadut da ma ai” nga nna Buga Hpung masha langai kawn shana wa ai.
Ndai Nawku jawng gaw mare na Asuya salang ni kaw tara shang atsawm hpyi shana nna, 1995 Ning Febuary (25) ya shani Rev. Dr. Saboi Jum, Rev. Labya Tu Lum, Rev. Sumlut Gun Awng ni jut nlung jahkrat let gawgap da ai hte 1996 ning hta Lamu ga jarit Sut Maden Ginra Up, Col. Soe Yi wa nan masing da ai shara kaw n hkra ai, dai majaw ngut hkra galaw la mu ngu da ai shara raitim, galaw gawgap da ngut ai hpang 2005 ning Febuary (20) ya, (25) ya shani kaw na gaw Nawku jawng htawt sit kau na matu dai ginra e ang ai salang ni alang lang sa shadut masai lam buga masha kaw na chye lu ai.
Asuya de na salang ni sha n-ga, 2005 ning September (26) ya hta gaw Maj. Hla Maw Oo a ta masat lawm ai aming hte “ Nwi Sin Co.Lt.” ni gaw shanhte a lamu ga she rai sai nga nna jak hte ganawk kau magang ai kaw na mung je da yu sai lam dai buga masha ni kawn chye lu ai.
Ndai lam hte seng nna Hpung na lit lu ai Komiti ni hku nna gaw seng ang ai, Mungdan Asuya Hkringmang Dap na hkum pat ai aming laika sha n lu madun yang n htawt sit na, bai nna 2007 ning May shata (7) ya shani gaw lawu na hte maren hpyi shana da ai lam chye lu ai.
1. Sut hpaga ginra gaiwang hta lawm ai hpungkyi jawng hpe gawgap ahkang jaw nna Hkristan Nawku jawng gaw n mai gawgap ai hpe n chye na ai.
2. Mungdan a masing rai jang gaw, asuya hkringmang langai ngai kawn Nawku jawng n mai gawgap ai ngu ai aming laika jaw marit ngu hpyi da ai hpe hpa garai n htang shana ai.
“Bai nna 2005 ning hta htaw sit hkrum ai Hindu nawku jawng hpe run nna sen hkying lam ma nna bai gawgap tim, Asuya kaw nna hpa myit ya ai lam n nga ai majaw sa shadut ai salang ni yawng a ga hpe n lu kam ai” nga nna buga masha langai tsun wa ai.
Ndai zawn Nawku jawng gawgap ai lam hpe pat jahkring hkrum ai myen mung hta grai law nga ai hta, Sammung lahta daw e, Kutkai Buga, Lashio Sinpraw Buga, Man Dung Buga, Sinli Buga hte ya ndai (105) Miles Bum San Buga ni hta Ginwang daw kaw na nan ma-ja sa jahkring shangun ai hpe chye lu ai.
.
Bss
Shai Hkat ai Daw Dan lam
August 28, 2008
Lai wa sai 2008 ning, August shata (20) ya shana de, hkying ( 7:00 ) aten ram hta, Man Maw mare, Kan Daw Gat ndaw e masha langai hpe mawdaw hte adawt sat ai amu langai byin ai lam buga masha langai kaw na chye lu ai.
Maw Maw, Man Je mare e jung da ai, Masat (319) Dap Dung, Dap Up, Major Awng Myu Nai gaw Man Maw mare na asak (66) ning rai sai, Salang Soe Myint ( Tset – Mu – Le – Ya Makan Dap, Magam Gun Usa) hpe adawt sat hkrup ai majaw Hpyen Tara Rung kawn Pukma – 21 hte ahkyak la, rim hkrum ai sha n-ga, Myen Gumhpraw sen – ( 80 ) shawa hkrum ai lam buga masha langai kaw na chye lu ai.
Lai wa sai 2008 ning, July shata (27) ya jahpawt hta Man Maw, Nmawk, Nam Sai mare na asak (15) ning sha naw re jawng num, Nhkum Hkawn Din hpe ra mi rai, roi rip nna zingri sat kau ai amu gaw ya du hkra je- yang dawdan ai lam re n nga ai sha n-ga, “ n tsen ai majaw jep san ai kaw lata loi lai mat ai she re; roi rip ai amu (rape case) n re, masha sat ai amu sha re ” ngu lahta de tang da ai lam chye lu ai.
Lahta na buga ginra langai hta sha shanu nga ai hpyen dap ni a manghkang hpe je yang sa wa ai hta ahkyak la, daw dan ai lam shai hkat nga ai.
Bss
Nang Hpam hte Tsi Mawan Nat Jasan Hpawng
Loi Kang e
galaw
Agust 27, 2008
Lai wa sai, 2008 ning, Agust shata praw (6) ya jahpawt hkying 10:00 aten hta, Lahta Sammung, Loi Kang mare (Masat- 4, Dingda Ginwang Ginjaw Ginra ) e Nang Hpam hte Tsi mawan nat jasan hpawng galaw lai wa sai lam buga masha langai kawn chye lu ai.
“ Anhte ginra hta Ka-ni, Nang hpam tsi mawan a majaw amyu masha ni sum machyi, jam jau lam amyu myu grai hkrum hkra nga ai majaw, Wunpawng Mungdan, Shanglawt Hpyen Dap kawn Ka-ni, Nang Hpam tsi mawan kasat shamyit ai masing hpe dingyang galaw nga ga ai. Dai majaw lu rim la lu ai tsi mawan ni hpe mung, mung shawa, Dap shawa ni hte hkaw tsun hpawng galaw let nat jasan hpawng ni mung galaw lu ai lam re” nga nna dai hpawng kaw lawm ai salang langai kawn tsun dan wa ai.
Ndai hpawng hpe Dingda Ginwang Ginjaw, Nang Hpam Pat Jasan Komiti Ningbaw, Du Kaba Zau Awn kaw nna Tingnyang Up galaw let Masat (4) Dap Ba Daju na Magam Dap, Makan Dap, Dap shawa yawng hte makau grup yin na mung shawa ni shang lawm nhtawm galaw lai wa sai lam chye lu ai. Dai shani nat jasan kau ai arung arai yawng Miwa Yuan – 705,700 (Sen sanit hkying manga sanit tsa), Myen Gumhpraw hku rai yang, Lap – 1271,53,105 /- ( sen hkying mi lahkawng tsa jan) a matu re lam chye lu ai.
Rim Zing La Lu ai Nang Hpam Arung Arai Jahpan
Date; 11.7.2008 hta rim zing ai
1. Sing Fing - N'tsin pung hpraw----- 1.
2. Sing Fing - 5 Liter pung----------- 1.
3. Sing Fing - 3 Liter pung----------- 2.
4. Acid - Liter pung----------------- 1.
5. Yuk Suk - Hka san soi -----------2.
6. Ya ma - Tsi hkyep jadung joi----- 2.
7. (Monotybe) - Hka Ge, joi (2) re---tawng --------5.
Date; 14.7.2008 hta rim zing ai
1. Yama htuk ---------------------- 11.
2. Yama - shadung joi--------------- 2.
3. Yama - shadung hkan------------- 2.
4. Wi sin yu - hka san soi------------ 2.
5. Nga chyu - shadung hkan--------- 1.
6. Yama - dawk samyit----------- 100.
Date; 15.7.2008 hta rim zing ai
1. Ya ma - sumbu 3'x 4' hpri sutdek---- 1.
2. Lu fan an - pung hpraw -------------- 7.
Date; 16.7.2008 hta rim zing ai
1. Nam hpam hpan hkum-- kawk ----------- 7.
2. Nsam shatsawm tsi hpan hkum - hkan----- 8.
3. Ch - 3. coona kawk----------------------- 1.
4. Wu lu fin kawk---------------------------- 6.
5. Wan Nra joi (2) htuk---------------------- 2.
6. Wai su yin - hkan-------------------------- 1.
7. Saw da shadung gyap (5) re htuk ----------1.
Date; 1 . 8 . 2008 hta rim zing ai
1.Pin shwi - pe pa pung------------- 6.
Manu yawng hpawn
Miwa Yuan – 705700,
(Myen Ks - 1271,53,105/-)
BSS
Jawngnum sha, Hkawn Din hpe sat ai lam Myen hpyenla ni hkam la
August 17, 2008
2008 ning August shata (16) ya shana hkying (8:00 pm) aten ram hta, Momawk Ninghtawn, Ninghtawn ( Myo Ne) Rung e, Nhkum Hkawn Din sat hkrum ai amu hte seng nna, Ninghtawn (Myo Ne) tara agyi wa nan, balik du ni, myen asuya ninghtawn (Myo ne) salang ni hte Nam Sai mare salang ni a man e, masha lata shaw shangun ma ai lam buga masha ni kawn chye lu ai.
“ Nmawk balik rung na ni jahpawt hkying (9:00) aten ram hta du lung wa nna, mare na sakse ni hpe wa shaga ma ai; shada la hkat, tara agyi hpe la rai shana she shada jep san, masha lata shaw ai lam lu galaw ai. Masha lata ai shaloi, hpyenla marai (9) hpe hpun palawng galai, shara galai di nna dinggreng tsap da nhtawm sakse yan hpe lata shaw shangun yang, (3)lang tup lata tim, Soe Tu Win ngu ai wa hpe chyu lu lata shaw da ai ” nga nna dai kaw lawm ai salang langai kaw na tsun dan wa ai.
Matut nna shi tsun ai hta, “ mana ( 15.8.2008 ya shana) tup, jahpawt hkying (3:00) aten du hkra ahkyuk kata e balik ni kawn san jep yang mung, dai Soe Tu Win ngu ai wa shi nan hkam la ai nga na chye lu ai ” ngu tsun dan ai kawn chye lu ai.
Ndai amu hta hpyenla ni marai – 3, (sh) marai – 2 lawm ai rai tim, ya gaw marai langai sha mara hkam la ai lam hpe buga masha ni myit n dik nga ai lam hte 17.8.2008 ya jahpawt na lu ai gaw “Hkawn Din hpe sat ai, hpyenla ni rai sai, dai majaw nta masha ni myit mu myit dik hkra lajang sa wa na ga ai” ngu Nmawk na Dap Dung (437) ni masha dat nna sa tsun ai lam buga masha ni kawn chye lu ai.
2008 ning August shata, (17) ya, Laban jahpawt hkying ( 10:00 – 11:00 ) aten laman, Momik Hpyen Zai Ladat Matsun Du, Du Up Jum, Col. Htin Maung Maw ( Momik Byuha Mu ), Dap Dung – 437 na Hpang lam lithkam hte Dap Reng, Maj. Min Tu hte kaga hpyen du (2), Manmaw Ginwang Balik Du, Thein Htun ( Ye Min Gyi ) hte kaga balik du (2), bai nna Momawk Ninghtawn na Salang Myint Soe (Myo ne Mu, Ma - Ya - Ka) ni lawm ai asuya masha kaba ni gaw sat hkrum ai Hkawn Din a kanu yan kawa kaw sa du jahkrum ai lam mare masha ni kawn chye lu ai.
Ndai du lung wa ai Asuya masha kaba ni gaw Nam Sai mare na mare salang, Hpung sara ni hpe saw la nna, Salang Nhkum Yawng Shawng wa a nta dawdap e nan myen gumhpraw lap – sen manga ( 500,000/- ) sa jaw let, shanhte a hpyenla ni a majaw byin lai sai hpe sa tawngban ai lam buga masha ni kaw nna chye lu ai. Nta masha ni a matu ra ai jum, n-gu hte jawng lung ai ma ni naw nga ai rai yang, ma ni a jawng jarik ni hpe mung hpyen dap kawn lit la mat wa na re lam, bai nna masha sat ai hpyenla hpe mung tara nga ai hte maren matut ahkyak la, jeyang mat wa na lam sa tsun n-gun jaw da ai lam mare masha ni kawn chye lu ai.
HKawn Din a kawa gaw, “ nye ma a asak baw ndai lap sen manga (500,000/-) hte sa galai da ya ai ga i? ” ngu n hkap la ya hkraw ai kaw, Du Up Jum, Col. Htin Mawng Maw gaw, “ dai hku n re, ya ra ai kaw gan jai lang na matu karum ai she re, ndai amu hpe seng ang ai hte maren tara rung e matut je yang hparan sa wa na ga ai ” ngu kahtap tsun da ai lam mare masha ni kawn chye lu ai.
Dai shani, myen hpyen dap kaw nna karum da ai arung aria ni gaw;
(1) N-gu – dang (3),
(2) Sau – joi (4),
(3) Nga-chyu kaw (5),
(4) Jum dwi – joi (2),
(5) Myen Gumhpraw lap – 500,000/- (sen manga) tup re lam buga masha ni kawn chye lu ai.
Bss
Nam Sai Dap na Myen Hpyenla yawng wa zing la hkrum
August 16, 2008
Gyi Aye Thein hte hpyenma (2), jawngnum Shayi Hkawn Din hpe roi rip nna zingri sat ai manghkang a majaw Manmaw, Nmawk ninghtawn, Nam Sai mare e jung da ai shawnglam hpyendap ting hpe 13.8.2008 ya jahpawt hkying 7:00 - 8:00 laman Momik Hpyen Zai Ladat Matsun Du, Du Up Jum, Col. Htin Maung Maw ( Momik Byuha Mu ) a matsun hte hpyenla marai (8) sengke hte lung wa nna wa zing mat wa ai lam mare masha ni kawn chye lu ai.
Ndai wa zing la hkrum ai hpyenla yawng hpe Nmawk e jung da ai, shanhte a Dap Dung- 437 de woi mat wa nna, Gyi Aye Thein hpe gaw ahkyuk de bang da sai lam buga masha ni kawn chye lu ai. Ndai Dap Dung – 437 a Gan Dap Dung Up gaw Maj. Awng Min Htun hte Dap Reng gaw Maj. Min Tu yan rai nna, ya yang shanhte hpe yu reng ai gaw Momik Hpyen Zai Ladat kaw na ading tawk jum nga ai lam chye lu ai.
Nam Sai mare e myen hpyendap jung ai gaw 1994 ning Wunpawng Mungdan Shanglawt Asuya a Buga Gaw Sharawt Masing shang ai hpang kawn re lam, ndai Gaw Sharawt Masing gaw dai ginra na mung shawa ni a galaw lu galaw sha lam bawngring rawt jat wa na matu hka la hkahkawng sa galaw ya let hkai lu hkai sha lam hpe madung woi shakut sa nga ai lam dai ginra na myitsu langai kawn chye lu ai. Bai nna hpyen n-gun mung, marai (5-6) kawn (14-15) sha sa chye nga ma ai lam matut chye lu ai.
Jawngnum kasha, Nhkum Hkawn Din gaw 2008 ning July shata(27) ya jahpawt hkauna de sa wa ai hkrunlam e roi rip zingri sat hkrum ai rai nna, shi a moi mang hpe gaw 2008 ning July shata (30) ya shana de she mu tam la lu ai lam, ya yang ndai roi rip sat ai hta madung rai nga ai, Gyi Aye Thein hpe mung ahkyuk de bang da sai lam buga masha ni kawn chye lu ai.
Bss
Amerika Buhkawm masha Beijing mare e sat hkrum
August 9, 2008
Amerikan Ta din (Volleyball) ginsup hpu-awn wa a jinghku langai mi Miwa la langai e ninghkyi hte htim galun nna si hkrum nhtawm, kaga ginsup hpan hpe woi awn ai sara wa a nta masha langai, bai shanhte hpe woi hkawm ai, Miwa shayi sha marai (2) gaw laja lana hkala nba hkrum, tsi rung rawng ai mabyin 9.8.2008 ya shani, mare Daju Beijing na mying kaba ai, Drum Tower ngu ai Maigan Buhkawm chyai ginra hta byin lai wa sai lam ITN shiga kawn chye lu ai.
Xinhua shiga dap ni tsun ai hku nga yang, dai masha sat ai wa gaw, Hangzhou sinpraw maga na Tang Yongming (47-ning)ngu ai wa rai nna masha galun sat ngut ai hpang, shi hkum shi mung nta htap (2) kaw na gumhtawn si mat ai lam chye lu ai.
“Anhte ndai zawn re shamu shamawt lam n byin hkra grai naw n-gun dat, sadi maja ra saga ai, shi hkum shi si hkam let shabyin dat ai ndai lam hpe tau hkrau shiga n lu la kau ga ai” ngu Beijing Mare Shim Koimiti salang ni kawn tsun wa ai hpe ITN shiga kawn chye lu ai.
Olympic hpaw poi sa lawm let Beijing mare e gan du nga ai, Gumsan Magam, George W. Bush kawn nta masha ni hte rau yawn hkyen nga ai lam, ndai hkala tsinyam hkrum nga ai nta masha ni a ra mara yawng madi shadaw lit la sa wa na re lam n-gun jaw ai hpe ITN shiga kawn chye lu ai.
“Anhte a myit ai lam hte kyuhpyi ai lam hta ndai hkala tsinyam hkrum ai nta masha ni hte rau re”, ngu mung tsun lai wa sai. Bai nna Amerika Dat Kasa Rung na ni mung byin ai hte rau dai shara de du sa nna, rung na salang ni nan tsi rung e sa sin nga ai lam ITN shiga kawn chye lu ai.
Ya yang gaw Beijing mare hte Olympic Ginsup poi dabang gaw simsa nga nna, mare daju lam nmaw hte ginsup dabang na lam ntsa e gaw shimlam la ai balik ni aten hpring yan kamawng nga ma ai lam, masha sat hkrum ai, bu hkawm shara, Drum Tower hpe gaw sumri ahtoi hte pat kau sai lam, ndai Bu hkawm shara Drum Tower gaw tsaban 13 th prat hta shachyaw da ai lam shiga kawn chye lu ai.
Bss
Nam Sai na Jingpaw Amyu Shayi langai hpe
Myen Hpyenla ni roi rip sat
August 8, 2008.
Lai wa sai July shata (27) ya shani, Manmaw Ginwang, Bum Sen Bum (Nmawk) Ninghtawn, Nam Sai mare, Lawk (1) kaw nga ai, Salang Nhkum Yawng Shawng hte Jan Maran Nu Bren yan a shayi sha, Nhkum Hkawn Din, asak (15) ning gaw myen hpyenla ni e jawm roi rip nna sat kau hkrum ai lam buga masha langai kaw na chye lu ai. 
Mabyin hpe san yu yang, ndai num sha gaw Nmawk Lahta Tsang Jawng e, tsang (8) hpaji sharin nga ai shayi sha rai nna, 27.7.2008 ya, Laban jahpawt hkying ( 9:00 ) aten ram hta hkauna de nga nga ai kahpu hpe n-gu bye (2) wa sa jaw na matu kanu e shangun dat ai hkrun lam kaw roi rip sat hkrum ai re.
Ndai numsha, Hkawn Din mat ai hpe pyi gaw shana kahpu nta bai du wa ai hpang, kanu yan kawa hpe, “hpa majaw n-gu n shagun dat ya ai?” ngu wa san dat jang she kasha mat ai lam chye nna, tam san hkawm tim n mu rai, Mare Komiti Rung de shana hkying ( 9:00 ) aten ram hta sa shana ai lam mare salang ni kawn chye lu ai.
Hkawn Din mat nna san hkawm yu yang, dai jahpawt shi lai lung wa ai ten, shi a hpang lalam (2) ram sha din nna myen hpyenla langai hkan nang ai hpe nga rem nga ai, Nam Sai mare na Salang Lahpai Zau Bawk gaw hkauna wa kawn mu dat ai lam, dai jahpawt Hkawn Din lai ai lam hku kaga masha kadai mung n lai hkawm ai hpe mung chye lu ai.
Bai mare hte kade n tsan ai kaw Mai Ja lam hte Wa Baw lam numshe e hka la hka-hkawng langai nga ai. Dai hka la hka-hkawng hku jahpawt hkying (10:00) aten ram hta Salang Maru Hpang hkan yu hkrat wa ai shaloi, myen hpyenla (1) hpe wa mu nna, “gade law” ngu san yang, “woi hkan gap hkawm nngai”, ngu htan ai da. Shaloi e jang shi manang hpyenla langai shaga dat nna, “yu wa nga nngai” ngu bai htan let lam numshe de pru mat wa sai lam buga masha ni kawn chye lu ai. 
28.7.2008 ya jahpawt hkying (4:00) aten ram hta Mai Ja lam hte Wa Baw lam numshe, myen hpyenla ni nga hpaga hkap sha ai shara e, yi wa dingsa nga ai kaw kanu wa mayun yu yang, myen hpyenla marai (3) hpajawng baw htinggrum nna yup taw ai hpe wa mu rai, mare de nhtang wa nna mare salang ni hte dai shani ting hkan tam tim n mu ma ai lam, shana de daw kanu lam numshe de kalang bai lung wa nna hpyenla ni marai (3) hpe wa san yang, “asak kade rai sata?” ngu hkap san nna, “15 ning rai sai” ngu htai jang, “shi sumtsaw hpang hkan nang mat sai rai nga ai” ngu hkap tsun ma ai lam buga masha ni kaw na chye lu ai. 
29.7.2008 ya shani ting mung yawng grai jawm tam tim kaga n mu ma ai lam, shingrai 30.7.2008 ya shana de hkying ( 2:00 ) aten hta she si taw ai mang hpe sa mu tam ma ai lam, mang garai n mu tam yang, shi gun ai shingnoi, shi bu ai hkahku labu tsit, hte palawng ahtoi daw chyen hte shi a gyepdin ni ayai aya taw ai hpe shawng tam mu nhtawm, Mai Ja lam hte Wa Baw lam numshe kawn pe (200) ram hta singgu krin dip lup da ai hpe sa mu ai lam Buga masha langai kawn chye lu ai. 
Hkawn Din a mang kaw mu lu ai ningma hkang ni gaw;
(1) Baw adup agrawp kau ya ai.
(2) Hkra maga lahpa npu e ninghkyi hte galun da ya ai.
(3) Du kadoi da ya ai.
(4) Myi (2) maga achyaw baw kau ya ai.
(5) Myiman ting hpe adup agrawp kau ya ai.
(6) Kan e mung galun da ya ai.
(7) Num hkrang kaw mung ra mi rai, roi rip ngut ai hpang galun da ya ai hpe mu lu ai.
“Hkawn Din mat ai hte rau Nmawk Balik Dap de shana sai, bai mu tam ai shaloi mung sa kahtap shana tim, sak se hkrak n mu ai majaw ahkyak n mai la ai, sak se naw wa tam mu ngu sha tsun dat ma ai”, nga nna grai hkam sha ru let buga masha langai kaw nna shana wa ai.
Ndai Nam Sai mare kaw myen hpyen ni a Hka - Ma – Ya, Masat (437) Dap kung langai jung da ma ai rai nna, Dap Kung Up (Post Lithkam) gaw Gyi Jum Thet Htun ngu ai wa re lam, ndai roi rip sat ai kaw gaw Gyi Aye Thein hte hpyenla marai (2) re hpe buga masha ni kawn chye lu ai.
Bss
Beijing e Olympic Ginsup Hpaw Poi Galaw
August 8, 2008.
Makau grupyin makawp maga hpung ni hte mung masa hpung ni amyu myu jebat nga ai lapran kaw, American dollar wan billion ( 40) jan hkrat hkam let, (29) lang ngu na Olympic Poi kaba hpe prat dep ai, hkikhkam tsawm htap ai hku Beijing mare daju, U tsip Gawknu, “Birds Nest Stadium” e, 2008 ning shata man (8), praw(8), shana hkying (8), minutes (8),hte second (8) hta hpaw hpang dat lu sai lam chye lu ai.
Ndai hpaw poi lamang hpe Miwa mungdan Gumsan Magam, “Hu Jintao” kawn “Birds Net Stadium” ngu ai, U tsip Gawknu e du nga ai, poi sa shawa marai (90,000) hte, mungkan ting na dantawk TV yu nga ai shawa ningtung ningba marai billion (4) jan a man e, “ndai ten kaw nna, 2008 Olympic Poi hpaw hpang sai” ngu tsun ndau let kabu gara hpaw hpang la sai lam chye lu ai.
Mungkan Olympic Komiti Ningbaw, Jacques Rogge kawn mung, Miwa mung gaw Olympic poi kaba hpe Beijing mare e lu galaw hkra ngu shingran da ai aten grai na sai hte dai chyinghka hpaw lu hkra grai shakut sai ngu tsun lai wa sai. Shi hku nna,”daina gaw dai shingran kaja wa byin nga sai majaw, Beijing hpe shagrau sha-a nngai” ngu matut tsun lai wa sai.
Dai hpang 1984 ning Los Angeles e galaw ai Olympic hta Ja Dazik (3) lu la ai, ginsup ninghkring, Li Ning gaw nshang e sumri gyit nna kanghkau hku lagram pyen hkawm nna, Olympic wan di-jang kaba hta wan wa shachyi let hpaw poi hpang dat sai.
Hkying hkum (4) na ai hpaw poi lamang hpe woi awn ai wa gaw Oscar shagrau kumhpa lu yu sai, sumla hkrung matsun du, Director Zhang Yimou rai nna, ndai hpaw poi lamang hta mungdan 204 na masha 5000 shang lawm ai lam, bai nna lamu de nsam tsawm hpa amyu myu hku gap kapaw ai wan dumlawng, 35,000 gap kapaw ai lam chye lu ai.
Ndai poi angwi apyaw galaw lu na matu balik marai (100,000) shim lam lit la ya nga ai sha n-ga, hpaw poi galaw ai ten, Mungdan kata na nbung pyenli daru yawng pat da shangun ai lam, Beijing mare kata na mare masha wan (17) hpe mare Uphkang rung kaw nna yawng bungli hkring laban ban na hte nta nhku kawn shinggan n pru na aming jahkrat da ai lam chye lu ai.
Bss
Hpaw Poi ni tim, Manghkang n zim , N san seng ai Nbung hte Internet jum tek da ai lam shayawm ya na Miwa Asuya hpe IOC kawn sadi jaw
August 5, 2008
2008 Ning August shata praw (8) ya shani hpang na Olympic ginsup poi hpaw hpang na ntawn e, mayak manghkang ni hkrai naw rai nga ai lam Ruiter shiga kawn chye lu ai.
Mungkan Olympic Komiti ( IOC ) gaw lai wa sai (2) ya hta Miwa Gumsan mungdan, Beijing mare kaba e galaw na Olympic poi hte seng nna, Miwa Olympic Poi Shabyin Shatai Komiti hte ra ahkyak bawngban jahkrup lai wa sai lam chye lu ai.
Ndai zawn bawngban ra wa ai lam gaw, hpaw poi nhtoi ni magang wa tim, n san seng ai nbung naw hpring chyat nga ai sha n-ga, mungkan na shi laika sara ni, shi sawk ninghkring ni lang na Internet, Website law malawng pat da ya ai majaw Mungkan Olympic Komiti (IOC) kaw nna dai mayak manghkang hpe lawan hparan jasan kau na sadi jaw da ai lam re.
Miwa Gumsan Asuya gaw, 2008 ning Olympic Poi shabyin shatai jai gumhpraw hpe labau hta garai n nga yu, garai n jai yu ga ai, American Dollar wan Billian (40)jan shama nna galaw sa ai rai tim, teng galaw ra ai, mungdan kata na n san seng ai nbung hpe n lu shamat, n lu shayawm nga malu ai. Dai sha n-ga, Miwa Asuya ni poi madu tai na ahkang hpyi ai ten, Internet, Website yawng lu yu hkra ahkang jaw lajang ya na ngu ga sadi jaw da ma tim, ya gaw poi a shiga ni hpe aten dep galaw na Website law malawng n mai hpaw yu nga ai. Mying kaba ai shiga dap nkau ni, shanhte a Website hpaw n mai ai majaw myit htum shajang nga ma ai majaw IOC gaw manghkang ndai lawan jasan kau na matu Miwa Asuya hpe shadut nga ai lam chye lu ai.
Miwa Gumsan Magam, Hu Chyin Tauo hku nna mungkan shi sawk ninghkring ni, shiga dap ni bungli byin hkra lajang sa wa ya na rai tim, mung masa hte seng ai website ni hpe gaw matut jum tek mat wa na re lam tsun lai wa sai hpe chye lu ai.
Bss
Beijing Olympic Num Gawdin Shingjawng Poi hta Jinghpaw Wunpawng Amyu Shayi Tara Agyi sa galaw
5.8.2008
Miwa Gumsan mungdan e, du na August shata praw (6) kawn (23) ya laman galaw na Olympic Num gawdin shingjawng poi hta Munghpawm Myanmar mungdan, Gawdin Hpung Ginjaw na Jinghpaw Wunpawng amyu shayi tara agyi langai rai nga ai, Saranum Kaw Ja sa du bungli gunhpai lawm na re lam chye lu ai.
Ndai Olympic num gawdin shingjawng poi hta ka-ang tara agyi marai (12), makau tara agyi marai (24) yawng marai (36) sa du bungli gunhpai na rai nna, Myanmar mungdan na gaw J.W Amyu Shayi Saranum Kaw Ja, shi langai hkrai sha lu shang lawm ai lam chye lu ai.
Bss
Mai Ja Yang e “Build” Chyum Laika sharin hpawng galaw
July 24,2008
2008 ning July shata ( 7- 24) ya shani du hkra (4) Lang na Manmaw Ginwang Hpung Sara/num ni a “Build” Chyum Laika sharin hpawng hpe Mai Ja Yang muklum, Rev.Marip Naw Masat Htingnu hta galaw lai wa ai lam chye lu ai.
Ndai sharin hpawng hta, sa sharin hkaja ai, Buga hpung na magam gun ni gaw, jahpan bang ai marai (46), maram hkaja (observer) marai (2) hte rai yang yawng marai (48) re lam, sa woi awn sharin ya ai sara/num ni gaw marai (6) re lam sharin hpawng hpe woi awn ai, Rev. Gam Awng kawn chye lu ai.Ndai zawn re ai sharin hpawng hpe shaning shagu galaw nga ai hta, dai ning na gabaw ni gaw, (1) Jaw Jau Laika, (2) Bu Hkawm Laika hte Bible Walk Through,(3) Tara Jahprang Laika,(4) I & II Htesaloni,(5) Kasa Laika, (6) Hebre ni re lam chye lu ai.
Ndai "Build" ngu ai ga hkum gaw, “Biblical Institute of Leadership Development” ngu ai ga si ni kaw na lachyum la da ai rai nna, Chyum mungga hpe madung hti sawk hkaja ai ladat hte KBC shingwang ting hta sha n-ga, Manmaw Ginwang kata hta gaw lai wa sai 2004 ning hkan nna hpang wa ai lam Rev. Dashi Gam Awng kaw nna chye lu ai.Ya du hkra Chyum Laika na gabaw (21) hti sawk, hkaja ngut nna du na shaning ni hta mung matut galaw sa wa na re la chye lu ai.
Bss
July 20, 2008
2008 Ning July shata ( 15 – 18 )ya laman J.W. Ramma Hpung (Sam mung) ni hku nna Ramma Hpung a (4)ning ladu hkrum zuphpawng hpe Wunpawng mungdan, Nba Pa, Lana Zup e galaw ai lam chye lu ai.
J.W. Ramma Hpung (Sam mung) hpe hpaw ninghtan sa wa ai gaw, lai wa sai 2004 ning July shata (16)ya shani e re majaw dai nhtoi hpe mahta nna ladu hkrum hpawng galaw ai lam hte ya ndai hpawng hta du wa na mu gun ladaw (2008 – 2010)ning laman na mu gun nnan ni hpe mung lu lata san shatsam la sai lam Komiti malawm langai kaw na chye lu ai.
Dai J.W. Ramma Hpung (Sam mung) a yaw shada lam madung gaw;
1. Amyu Wunpawng Ramma shada matut mahkai, myithkrum kahkyin gumdin let kanawn mazum lu na matu
2. Amyu Htunghking, Laili laika hpe tam sawk, hkaja let sharawt saw a lu na matu
3. Amyu Wunpawng sha ni nanghpam lusha tsinyam kaw nna lawt kawt lu na matu
4. Amyu sha magam lam ni hta shada rau lata gindun, jawm gunhpai lu na matu
5. Amyu Wunpawng Ramma ni rawt jat galu kaba lam ni hpe woi awn galaw saw a lu na matu re lam Komiti malawm langai kaw na chye lu ai.
Ya ndai aten hta Sut Tam Komiti ni woi awn let Wun Sut Mung Hpaga Komiti langai hpaw nhtawm ramma ni a sut masa hpe woi jasat hpang nga sai hte ndai Wun Sut Mung Hpaga Hpung byin wa hkra hpaji jaw, arang jawm shaw nna galaw sa wa na re lam mung chye lu ai.
Bss
Namhkam, Ngalaw mare masha ni n tara jeyang, rim hkrum sai.
Junly 9,2008
2008 Ning, July shata praw(9)ya shani, Namhkam Tara Rung e jeyang ai hta, Sammung, Namhkam ninghtawn, Ngalaw mare masha marai (4) n tara ai hku jeyang dawdan, rim hkrum ai lam Buga masha langai kaw na chye lu ai.
Ndai mabyin gaw 2007 ning, November (25) ya hta Namhkam ninghtawn, Ngalaw mare masha ni a "nga" ni, shanhte mare lamu ga Eka(500) ram hpe hpyen gumshem ni a daru aming hte ma-ja la-ba ka-up zing la ai, Salang Mawng Tsai a Kanoi sun shang ya ai kaw na hpang ai re. Salang Mawg Tsai gaw U Ring Sau Si (Chyet Su) hte Kanoi (Rubber) Eka (2) ram hta n tai n mai hkai da masu nna, Ngalaw mare grupyin na hpun ni hpe madung kran dut sha ai wa re. 2007 ning December (2) hta mare na "nga" (6) rim la nna shi sun na Kanoi hpun (429) jahten ya ai majaw Sen (60) wa ya na matu Tara Rung e sa shawk shawn da ai raitim dai ram mung n jahten hkrup ai, jaw na mung n lu ai mare masha ni hpe 2008 ning July praw (9) ya shani Namhkam Ninghtawn Tara Rung kaw na Tara Agyi San Myint hku nna Salang Zau Dim(45)ning, Salang Nan Tawng(37)ning, Salang Hpaure Law Hkin(35)ning, Hpawmi Hpaure Dawra Ma Tawng(50)ning ni hpe Pukma- 427 hte(1)ning mi Pukma- 447 hte shata(3) rai, marai mi laning mi shata masum hpra Hkyuk htawng jahkrat kau dat sai lam chye lu ai.
Ndai zawn byin ai lam hta Ninghtawn Uphkang Rung na ni, Balik ni, Tara Rung na ni kadai mung Ngalaw mare de ta tut sa yu jep chyoi ai lam mung n nga ai sha, bai nna mare na myit su salang kadai mung n lawm ai sha, shawoi na zawn san jep na matu rung de sa hkrum ai kaw ya na zawn mare masha ni hpe Tara Rung kaw na Htawng (1)ning mi shata (3)jahkrat rim rawng kau ai hpe mare masha yawng grai myit n pyaw shajang nga ai lam Buga masha langai kaw na chye lu ai.
Bss
Labau, Htunghking, Rida maka, Buhpun sumli, Sumroi, Maumwi, Likit, Ginsup,
Gaw sharawt, Nanghpam jasan, Nagis tsinyam, San-htai, Numshawn,
