NGALAW MARE MASHA NI
N TARA JEYANG HKRUM NGA AI LAM
June 20, 2008
2007 Ning,November (25) ya hta Sammung Namhkam Ninghtawn, Ngalaw mare masha
ni a "nga wuhpung", Noi krat hpun sun shang ya ai manghkang ya yang
n tara jeyang hkrum nga ai lam chye lu ai.
Ndai lam hpe san yu yang, Ngalaw mare masha ni moi kaw na galaw sha nga ai hpalap sun, hpundu sun, hpun sun,(Eka-500) ram hpe Salang Maung Tsai hte manang ni marai (3) gaw, 1998 ning hta Lashio Taimu Maj.Gen. Thiha Htura,Tin Aung MyitOo (ya na Na ya Hpa Amu Madu I) a lakhtak kaw zing la ai re lam Buga masha langai kaw na chye lu ai.
"Noikrat Hpun (Eka-2 ) ram sha sa hkai da nna, nhpan mung n kum, yu gawn ai lam mung n nga re majaw 2007 November (25) ya shani sun de mare na Nga (6) sa shang hkrup ai rai nga ai. Dai Nga ni hpe rim la nna,December (2) ya hta Namhkam Ninghtawn Tara Rung e Salang Maung Tsai ngu ai Miwa la gaw mare masha ni hpe Sen (60) jaw ya na matu shawk da ai re" ngu Buga masha langai tsun dan wa ai.
Nga madu mare masha ni gaw kahtawng ting jawm wa tim n dang wa na tai ai lam Buga masha langai mi kaw na chye lu ai.
Ya ndai manghkang gaw tara rung e naw dangrang hkat ai hte du wa na Jun shata (24) ya shani hta mung jep chyoi na lam chye lu ai .
Kodawng Nnaw
Kawa Masat Laban Nhtoi
June 15, 2008
2008 ning June shata (15) ya shani gaw Kawa Masat Laban Nhtoi rai nga ai.
Kawa Masat Laban Nhtoi a labau kadun
Kashu kasha ni hku nna tinang a kawa ni hpe shagrau chyeju dum masat na myit
hpang ai gaw Amerika mung Washington, Spokane mare kaw re. 1909 ning na Kanu
Masat Laban Nhtoi e mungga madat nga ai, Sonora Smart Dodd mying ai hpawmi
wa gaw Kawa Masat Laban Nhtoi hpe mung shagrau masat galaw ging ai ngu myit
shakru hpang ai lam chye lu ai.
Sonora gaw shi a chyinghkai kanu n nga mat ai hpang, kawa William Jackson
Smart mahtang shannau ni hpe galu kaba wa hkra tsawra myit hte mayak mahkak
amyu myu a lapran e n-gun jaw, woi lakawn, bau makawa ai chyeju ni hpe myit
dum let galaw hpang dat ai re. Yawng a shawng na Kawa Masat Laban Nhtoi gaw,
Kawa shangai ai June shata hpe mahta nna, 1910 ning June shata (19) ya shani
Amerika mung, Washington, Spokane mare e Sonora shi nan woi galaw hpang dat
ai re lam chye lu ai.
Mungkan madang hku chye wa ai lam gaw, 1926 ning e Amerika mungdan hku nna
Kawa Masat Laban Nhtoi shabyin shatai komiti shawng hpaw hpang sai. 1956 ning
na Amerika Rapdaw Zuphpawng kaba hta gaw dai hpe masat shagrin dat sai lam
chye lu ai. 1972 ning hta Gumsan Magam Richard Nixon hku nna mung Kawa Masat
Laban Nhtoihpe June shata na Laban (3) ngu na bat hta galoi mung galaw sa
wa na masat jahkrat da sai lam chye lu ai.
Dai majaw "Kawa Masat Laban Nhtoi" ngu ai gaw kamhpa, manoi ging
ai, chyeju madu kawa ni hpe masat shagrau sha-a ai kashu kasha ni a kraw kata
na prut pru wa hkamsha lam rai nga ai.
BSS
2008 ning June shata 13 hte 14 ya shani hta (1) lang na Muse
Buga Kawa La ni a "N-gun awai sharin bawngban hpawng" galaw ai lam
chye lu ai.
Ndai sharin hpawng hta madung sa sharin ya ai sara ni hte gabaw
ni gaw,
(1) Rev. Labya Kum (Nbaw gat pa) hku nna "Karai Kasang Kawa la ni hpe
jaw ai bungli lit madung"
(2) Rev. Hkangma Brang Mai (Bum san buga) gaw "Tsan ban 21 Kawa la"
(3) Sara Sumlut Brang San (Muse) kawn "Tara rapra Yesu hta sha"
ngu ai gabaw ni re lam Muse Buga na salang langai kawn chye lu ai.Sharin ya
ai lam hpe jahpawt hkying 8:30 aten kawn shana 9:00 aten du hkra re lam chye
lu ai.
Ndai sharin hpawng hpe Muse Buga, Rev. Usa Lashi Naw Masat Htingnu hta galaw sa wa ai rai nna sadu sharin bawngban lawm ai Kawa la ni yawng marai (40) ram re lam buga masha langai kawn chyelu ai.
Lai sai ten Ginwang madang hku hkrai woi galaw law rai nna ya lang gaw Buga Hpung hku shawng galaw ai n-gun awai sharin bawngban hpawng re lam chye lu ai.
Bss
2008 ning June shata praw (3) ya shana, Miwa gindai ten hkying (8:00) aten
hta, Miwa Gumsan Ginjaw Shiga Dap na du hkrat wa ai shi sawk ninghkring ni
hte W.P Ginru ginsa Labau Ninghkring langai mi, Mangshi mare e hkrum jahta
ai lam hpe CCTV- 4 kaw na dan tawk madun lai wa sai lam chye lu ai.
Ndai lam hte seng nna Du Kaba Manam Tawng hpe san yu yang, " Re. Teng
ai, ngai hte Miwa Gumsan Mungdan, Ginjaw Asuya a CCTV- 4 kaw na shi sawk ninghkring
ni June shata praw(3)ya shana, Miwa gindai ten, hkying 8:00 aten hta hkrum
jahta ai lam hpe Miwa ga hku nna mungkan mungdan (100) jan de dan tawk shapoi
madun dat lu sai" ngu tsun dan wa ai. Dai shi sawk ni hte rau Manau Buga
Nshawn hte Jinghpaw bumga de mung wa du nhtawm labau hte seng ai,htunghking
hte seng ai hpe dem gayet shapoi madun dat lu sai lam chye lu ai.
Ndai CCTV- 4 shi sawk ni sa du hkrum jahta ai shaloi, Du Kaba Manam Tawng
hku nna madung tsun sanglang dan ai gaw Jinghpaw Wunpawng ni a ginru ginsa
labau hte seng ai, htunghking hte seng ai lam sha n-ga, grau nna masha yawng
hpe shamau kau ai gaw shaning (7000) ning na sai Lungseng htu-ren hte shaning
(2000) ning na sai, La-bat lahkawn a lam ni re hpe chye lu ai.
Daini du hkra Htu-ren hpe dum lang ai ni gaw anhte Jinghpaw Wunpawng myusha
ni sha rai nga ga ai. Ndai anhte dum lang ai, lungseng hte wawt da ai htu-ren
hpe, 2004 ning Miwa Gumsan mungdan,Pejing lahta, Mun Gu mung jarik hte Haw
Be mungdaw e mu htu shaw nna, La-bat hpe gaw Pejing mare makau deng (10) ram
tsan ai shara hta mu htu shaw la lu ai lam chye lu ai.
Ndai lungseng htu-ren hpe mu htu shaw ai ten, dai hpe gadai ni, gara hku dum
lang ai, gara amyu bawsang ni a madum rai re, ngu hkrak mahtai n shapraw lu
ma ai raitim, dai lam hpe na ai hte rau, Du Kaba Manam Tawng wa du nna gara
hku dum ai, gara ten hta dum lang ai lam hte anhte amyu sha ni kaw daini du
hkra dum lang nga ai lam wa tsun dan lai wa sai. Dai majaw Ginjaw Asuya CCTV-
4 ni ya na zawn sa du san- htai galaw nhtawm mungkan de ndau madun dat ai
lam re hpe chye lu ai.
CCTV - 4 kaw nna shapoi madun dat ai hpang, (2-3) ya kawn mungdan kata hte
mungdan shinggan hkan na labau sara kaba ni matut mahkai wa nna laklai ai
gasan ni hte san sagawn wa ai lam ni pru wa nga ai lam Du Kaba Manam Tawng
kawn chye lu ai.
Du kaba Manam Tawng gaw Sakhkung mungdaw Pati Rapdaw Dinggrin Salang Usa rai
nna, ya yang gaw Sakhkung Mungdaw Asuya Hpaji jaw Ninghpung Salang hte Sakhkung
mungdaw Amyusha Htunghking hte Ginru ginsa Labau Sawk Sagawn Dap, Lithkam
rai nga ai.
(Shaning 7000 ning na sai Lungseng Htu-ren hte shaning (2000) na sai La-bat lahkawn hte seng nna laksan matut tang sa wa na ga ai).
Myu Shingyan
Mati Mangai Ngai Sai
June 13, 2008.
Sammung Jinghpaw Wunpawng Ramma Hpung, Sut tam Komiti ni lit la nna 2008 ning January shata praw (8) ya shani kawn hpang da sai "mati" hkai sha ai masing gaw, 2008 ning June shata praw (1) ya shani e kungkyin mi (1kg) hta Miwa yuan (4.5) hte lu dut sha nga sai lam chye lu ai.
Ndai mati hpe Miwa ga hku, "ki zung" nga ma ai. Dai hpe hpun shadaw
(sh) kawa shadaw jun nna, pinra ra tawn ai ntsa e, yi-hku, kumshu lap, nga
hkyi, gumra hkyi, kumshu shup la ngut sai pa ni hte kaga dat tsi, hka ni jaw
nhtawm shayet gale ngut ai hpang, pinra ntsa hpai mara tawn ai namhpun ni
hpe kabaw jahkut kau nna "mati" ali mara hkai ai re lam chye lu
ai.
Hpun hte kawa pinra gawgap ai hta lata shang ai hta n-ga, yi-hku,nga hkyi,
kumshu lap htaw hpai shayet ai lam ni hta mung shata (1,2) bungli kyin dik
ai raitim, mati lu hkai mara sai kawn bat (2) jan hta mati tu pru wa ai hte
gaw aten dep paw nna kabaw ai gatlawk de dut bang nna gumhpraw hti la ai hkai
nmai rai nga ai. Ndai mati gaw tu pru wa sai kaw na shata (7) kawn (9) ram
di sha mai ai lam chye lu ai.
Mati ginsum (1) gaw galu de pe (30) jan, kaba de pe(10) jan dam ai kaw hpun
hte kawa lang nna gawgap ai hta Miwa yuan mun mi jan ma ai raitim, shadawn
shadang tup hkrak galaw yang pru dik ai nhtoi ni kaw lani mi kungkyin (200)
jan pru ai re majaw, yuan (1000) jan pyi lu di ai lam chye lu ai.
Dai majaw nga hkyi,gumra hkyi, kumshu lap law nga ai shara ni hta mati hkai
ninghkring ni, mare buga ningbaw ningla ni, mare masha ni myitmang shabawn
nna galaw sha mai nga ai lam mu chye lu ai. Miwa Gumsan mungdan e gaw lai
wa sai (2,3) ning hkan nna Mungdan Asuya nan woi awn let jarit mayan hkan
galaw lu galaw sha ai buga mung shawa ni a matu yaw shada let mati hkai sha
masing hpe jahkrat dat ai lam re hpe chye lu ai.
Ndai mati gaw katsing di nna kashin shadu sha yang mung mu, tsi mung tai re majaw jahpawt gat hkan mai dut sha nga ai zawn, kabaw jahkraw nna maigan de sa ai gatlawk nga ai majaw anhte myusha ni mung hkai sha chye rai sai ngu shachyen ya dat ai re.
Myu Shingyan
J.W Htunghking Hpung Komiti
Hpaw Jat
June 4, 2008
Muse Ginwang Daw a Jinghpaw Wunpawng Htunghking Hpung Komiti ni woi awn nna
Hpawng Seng Ninghtawn Jinghpaw Wunpawng Laili laika hte Htunghking Komiti
nnan hpe 2008 ning, June shata praw (5) ya shani hta hpaw ninghtan sa lu sai
lam chye lu ai.
Muse Ginwang Daw a Htunghking Salang ni rai nga ai, Du wa Lahtaw Hkun Seng
(Sammung J.W. Laili laika hte Htunghking Ningtau Ningbaw hte Muse Ginwang
Daw Htunghking Ningbaw), Salang Zatang Lum Hkawng (Muse Ginwang Daw Htunghking
Ningbaw Usa), Salang Lashi Tu Ja (Muse Ginwang Daw J.W. Htunghking Hpung,
Ramma Komiti Amu Madu), Rev. Tangbau Dai Hkawng (Mung Gu Hpung Up), Salang
Labang Zau Lum (Mung Gu Htunghking salang) nig aw 2008 ning June shata praw
(4) ya shani Hpawng Seng mare de du lung wa nna, Salang Labang La (Buga Hpung
Ningbaw), Sara Mangshang Ying Ying Sau (Buga Hpung Amu Madu), Sara Zinghang
La (Buga Hpung Ningtau Amu Madu), Du Kaba Dumdaw Tang Gun (Hpawng Seng Mungchying
Mungshawa Makawp Maga Dap, Dap Up) ni, kaga salang ni hte wa hkrum bawngban
nhtawm, June shata praw (5) ya shani hta Hpawng Seng Ninghtawn Jinghpaw Wunpawng
laili laika the htunghking hpung komiti nnan hpe hpaw shabawn da lu sai lam
chye lu ai.
Hpawng Seng Ninghtawn hta mare kahtawng yawng (26) nga ai rai nna, dai buga
ginra na myitsu salang ni, hpawmi ni yawng marai (70) jan shang lawm nhtawm
Hpawng Seng Du wa Tangbau Hkun Soi (Dai Lum) Masat Nawku Htingnu e nan mu
gun Komiti Nnan kata san da let ap nawng Kyuhpyi hpawng hpe June shata praw
(5) ya shani hkying (1:00 kawn 2:00) laman hta galaw la lu sai lam chye lu
ai.
Hpawng Seng Ninghtawn Jinghpaw Wunpawng Laili laika hte Htunghking Hpung Mu
Gun Komiti
1.Salang Lagwi Ying Bawm (Man Sa mare) (Ningbaw)
2, Salang Lagwi Ying Bawm (Pa Wang mare) ( N/T Ningbaw)
3. Salang Zinwa Zau Nan (Amu Madu)
4. Salang Jumwu Hawng Dau (N/T Amu Madu)
5. Salang Lahpai Zau Tawng (Kunhting)
6. Sara Zinghang La ( Jahpan Jep)
7. Salang Zatau Lum Ze (Hpaji Jaw)
8. Du Kaba Dumdaw Tang Gun (hpaji jaw)
9.Sara Lahpai Zau Shan (Hpaji jaw)
10.Salang Labang Kying ( Hpaji jaw)
11. Salang Labang La (Hpaji jaw)
12. Jan Nhkum Roi Ji (Num Kasa)
13. Sara Mangshang Ying Sau
ni rai ma ai.
Myusha ni a rawt jat kalu gaba wa na lam hta makam n ginhka ai sha, myit mang
shabawn let mayu, dama, hpunau hta makyit sumri ngang ngang kang kang htunghking
langai hta chyawm tsap de sa wa na matu re.
Myu Shingyan
Shwili mare e galaw ai Hkawn
Seng Poi
May 3-5, 2008.
2008 Ning May shata praw (3-5) ya, laman Miwa Gumsan mungdan, Shwili mare
Hpa Se pa na Manau wang hta, Shwili hte Muse Jinghpaw Wunpawng Htunghking
Hpung Ramma Komiti ni woi awn ai Hkawn Seng Poi hpe galaw lai wa sai lam chye
lu ai.
Ndai Hkawn Seng hpaw poi lamang hpe 2008 ning May shata praw (3) ya shana
de Miwa hkying (5:30) aten e hpang sa wa ai hta Hpawng Hpa-awn hku nna Htunghking
salang, Lasham Yaw Htung woi awn ai hte Shwili Wunpawng Htunghking Ningbaw,
Du wa Gauri Gam kawn hkalum mungga shaga ya nhtawm, Muse Jinghpaw Wunpawng
Htunghking Hpung, Ramma Komiti Amu Madu, Salang Lashi Tu Ja kawn mung Hkawn
Seng Poi the seng nna tsun sanglang lai wa sai hpe chye lu ai.Ndai hpaw poi
lamang hpe shada myithkrum manhkrum lusha jawm sha let hpungdim dat nhtawm
shana na yungwi pinra hpe hpang wa ai lam chye lu ai.
Ndai yungwi pinra galaw sa wa ai hta Jinghpaw mung Danai, Mu Kawng, Namti Lambraw Yang, Myitkyina, Manmaw, Yangung, Sammung Kutkai, Nampakka, Mungbaw, Namtau, Muse hte Miwa Gumsan Mungdan, Janshi, Yin Jang, Nshawn, Shwili hkan na Yungwi Ninghkring marai (20) jan shang lawm shangwi shapyaw ai lam chye lu ai.
Hkawn Seng Poi ngu ai gaw, Jinghpaw Wunpawng myu sha ni a manu dan la ai htunghking
poi langai mi rai nga ai. Ramma ni, tsit lali tsawm ai ginra de, lu na sha
na baw sumhpa gun sa nna htunghking laka, jaiwa, ningchyun, ka manawt, yungwi
dum sumpyi, labau maumwi ni hpe garan kachyan, shangwi shapyaw hkat let, dai
htunghking lam chye ai myitsu salang ni kaw sharin hkaja la ai, Jinghpaw Wunpawng
Htunghking Poi langai mi rai nga ai.
Ndai Hkawn Seng Poi a yaw shada ai lam ni gaw;
1. Shingni Hkawn Seng Poi ngu ai hte maren, Wunpawng Ramma ni grau nna, shada
mahku mara, tsawra hkuhkau, hkridun galu kaba sa wa na matu,
2. Wunpawng Ramma ni htunghking shingni, yungwi shingni hpe prat dep rawt
jat wa na lam hta sharawng awng ai hte hkan sa shakut sa wa nna dai shingni
ni hpe tsawra makawp maga chye wa lu na matu,
3. Mungdan kaba (3) a htunghking lapran kaw shanu nga ai, Wunpawng saidaw
saichyen ni yawng shada mahkri shawn, myit hkrum mangrum kahkyin gumdin, htinglu
htinglai sa wa lu na matu,
4.Anhte a Wunpawng Htunghking madum sumpyi shingni, bu hpun mawn sumli, ka
manawt shingni ni n hten n mat na hte grau rawt jat kunghpan grin nga lu na
matu re lam chye lu ai.
Ndai zawn re ai kanawn mazum Hkawn Seng Poi hpe 2007 ning May praw (4-5) hta
mung galaw lai wa sai sha n-ga, Shwili Ginwang hta galaw lai wa sai hte rai
yang, ndai lang gaw (4) lang rai sai lam, Du wa Gauri Gam kawn chye lu ai.
Ndai poi hta Sinpraw Majoi Htunghking Ka manawt hpung ni mung sa du shanglawm
ka manawt lawm ai sha n-ga, Du kaba Manam Tawng (Mangshi) kawn mung Ginru
Ginsa Labau hpe laksan sa tsun hkai dan ai lam, bai nna ndai poi byin tai
awng dang hkra Salang Lahpai Gam (Shwili Gyu) kawn n-gun dat, atsam shaw woi
awn ya ai lam, matut nna du na ra ai shaning ni hta mung bai galaw sa wa na
re lam chye lu ai.
Hkik Hkam ai Manau Wang Nnan
bai lu sai
May 1, 2008
2008 ning May shata praw (1) ya jahpawt Miwa hkying 8:00 aten hta, Miwa Gumsan
Mungdan, Yunan mungdaw, Shwili mare Hpase Pa e hkik hkam ai Manau wang nnan
Hpaw Poi lamang galaw lai wa sai lam chye lu ai.
Lai sai ten na manau wang dingsa hpe Miwa Gumhpraw Yuan Sen (80) jan hkrat
nhtawm, hkik hkam ai manau shadung hte wang nnan hpe Miwa Asuya kawn bai gawgap
ya sai majaw Naushawng ninghkring marai (6) hpe mung shagrau masat dazik hte
woi awn sa wa na matu ahkang aya ap ya ai lam chye lu ai. Bai nna ndai Manau
Wang nnan Hpaw Poi, lai pan grang hpe seng ang ai asuya du, gyi, salang ni
hte htunghking salang ni rep di nna hpaw ya ai hte hpaw poi masat manau hpe
jahpawt hte shana daw hta manau la lu ai lam chye lu ai.
Mungkan Makau Grup-yin Masat
Nhtoi
World Environment Day
June 5, 2008
2008 Ning June shata praw (5) jahpawt hkying 8:00 - 9:30 aten hta Mai Ja Yang
Muklum, Manau wang Shawa Gawknu e Makau Grup-yin Masat Nhtoi sanglang hpawng
hte Cyclone Nargis laru sumla madun ai lamang galaw lai wa sai lam chye lu
ai.
Ndai zuphpawng hta Tingnyang Up hku nna Mrs. May Li Awng (Chairman of Kachin
Women Association- East Division) woi awn nhtawm, hpawng hpaw hkalum mungga
hpe Mrs. Mary Tawm (Community Development Program Coordinator, Kachin Women
Association-East Division)kaw nna tsun let hpawng sa wa sai lam, Makau Grup-yin
Masat Nhtoi hte seng nna, Sara Kaba Maran Zau Tawng( Intensive English Program)
tsun sanglang dan nna, Salang Kaba Sabaw Krang (East Division Officer of Kachin
Independence Organization) kaw nna mung shatsam mungga hte shatsam ya ai lam
chye lu ai. Ndai hpawng hta Makau Grup-yin makawp maga mahkawn hpe Intensive
English Program (IEP) jawngma ni hku nna shang lawm ai zawn Cyclone Nargis
laru sumla ni hpe mung madun sa wa ai lam chye lu ai.
Ndai hkaw tsun sanglang hpawng ngut ai hpang, Mai Ja Yang Muklum kata masha
uhpung (5) garan nhtawm, maza hta jasan ai magam bungli hpe jahpawt hkying
10:00 kawn 12:00 du hkra jawm hta jasan let maza ka (Pung) ni hkan san jahkrat
ai lamang galaw sai lam chye lu ai. Ndai hpawng de Mai Ja Yang Muklum e shanu
nga ai mungchying sha ni sha n-ga, Mai Ja Yang e gan du nga ai manam ni mung
sa du shang lawm shajang ai lam chye lu ai.
Bss
June 8, 2008
Daini gaw KBC Ma ni a Masat Laban Nhtoi rai nga ai. Mungkan Ma ni a Masat
Nhtoi, International Children's Day (ICD) hpe mungkan na mungdan malawng maga
gaw shaning shagu June shata praw (1) ya hta galaw ma ai. Mungkan hta Ma ni
a Masat Nhtoi hpe woi galaw hpang dat ai gaw Turkey mungdan ni rai nna, 1920
ning April shata (23)ya shani galaw hpang ai re.
Ndai Ma ni a Masat Nhtoi hpe mungkan madang hku woi masat lang wa ai gaw,
1925 ning, Switzerland mung Geneva mare e, "Well - Being for the Children"
ngu ai gabaw hte galaw ai Mungkan Zuphpawng Kaba hta shagrin masat let jai
lang sa wa ai re. Bai nna, June Shata praw (1) hta masat la ai lam hpe tup
hkrak n chye lu timung, lam langai nga ai gaw, Miwa Dat Kasa wa, (Chinese
Consul - general) wa hku nna Amerika mung, Sanfrancisco mare e Miwa Jahkrai
ma ni hpe mahkawng la nna "Dragon Boat Festival" ngu ai Bren Numraw
Wawn Shingjawng Poi galaw ya ai, 1925 ning June shata praw(1) ya hpe mahta
nna, Geneva Zuphpawng kaba hta masat wa ai rai na re ngu myit la lu ai.
Ndai Ma ni a Masat Nhtoi galaw na hte seng nna, Mungkan Wunpawng Hpung, United
Nation (UN) kaw na gaw, 1954 ning na Hkum Ra Zuphpawng hta she wa myit hpang
ai lam chye lu ai. Mungkan Majan ngut ai hpang, majan a majaw ma ni Mun lam,
Sen lam si hkrum, machyi makaw hkamja lam n lu, Jahkrai nmai tai, hpaji sharin
la na lam n lu rai, hten za ma ai majaw Mungkan Wunpawng Hpung (UN) kaw na,
1959 ning November (20) ya shani hta "Declaration of Rights of the Children"
ngu ai "Ma ni a ahkaw ahkang shatsaw sharawt ai ndau nsen" hpe shabra
dat sai. Dai shani kaw nna "Universal Children's Day" Mungkan Ma
ni a Masat Nhtoi hpe shaning shagu November shata (20) ya hta UN kaw na woi
galaw nga sai re.
Shawng daw e June shta praw (1) ya hpe Ma ni a Masat Nhtoi hku nna Communits
mungdan ni law malawng woi galaw ma ai raitim, hpang daw hta Amerika mungdan
mung masat jai lang ai lam chye lu ai. Dai hta anhte a htingbu mungdan ni
galaw ai Ma ni a Masat Nhtoi mung n bung shajang nga ai.
1. Miwa Gumsan Mungdan - June shata praw (1) ya
2. Thailand - January 2nd Week a Bat (6) ya
3. India Gala - November (14) ya
4. Bangladesh - November (20) ya
Ma ni a ntsa myit ya ra ai, UN kaw na masat da ya ai tara ni hta na daini
anhte bai myit dum na matu lawu de tara nkau mi tang madun dat ai;
1. Ma ni tsawra matsan dum ai lam hpe lu la ra ai.
2. Malu masha kaja hte tsi lajang ai lam hkam la ra ai.
3. Tinang amyu a madu lu ai ahkaw ahkang lu ra ai.
4. Shabrai n jaw ai sha, hpaji sharin la na ahkang lu ra ai.
5. Pyaw pyaw hte hkringsa ten lu ra ai.
6. Ma ni a atsam ningja hpe tsawra ya ra ai.
7. Ruyak hkrum ai shaloi, lawan dik ai hku karum ra ai.
8. Jahten labye byin jang alak mi matsan dum karum ra ai.
9. Amyu sai, shan, nawku htung n ginhka kau na.
10.Mungkan masha yawng hte jinghku hku kanawn mazum na lam lajang ya ra ai.
Daini na Ma ni a Masat Laban Nhtoi hta Nargis Laru hte Nnang nawn a majaw
tsinyam hkrum nga ai ma ni, shingbyi shara n lu nga ai jahkrai ma ni hte daini
Wunpawng ginra hta lam amyu myu hku yak hkak hkrum nga ai ma ni a matu myitdum
let lama ma mahtai tam sa wa ga!
Kodawng Nnaw