Bss : : Shawng nnan Sara Kaba a mying hte nga shara, bai ya magam gun nga ai Ginwang hte Buga hpe shachyen mayu ga ai.
Rev.G. A : : Mying gaw Rev.Dashi Gam Awng re. Manmaw mare Htoi San Buga Hpung a Hpung Up rai nna, Manmaw Ginwang “Build” Komiti Hpa-awn mung rai nngai.
Bss : : Ndai “Build” ngu ai ga si a lachyum gaw hpa rai kun?
Rev.G.A : : Ndai “Build” ngu ai ga hkum gaw, “Biblical Institute of Leadership Development” ngu ai ga si ni kaw na lachyum la da ai re.
Bss : : Ndai “Build” Chyum Laika sharin ai lam hpe Manmaw Ginwang hta galoi na hpang wa ai rai kun i? Bai nna ya lang hte rai jang kade lang lu sharin la sai kun i?
Rev.G.A : : Anhte Manmaw Ginwang hta 2004 ning kaw nna hpang wa ai rai nna, ya dai ning gaw (4) lang ngu na sharin hpawng rai mali ai.
Bss: : Ya dai ning (4) lang na Build Chyum Laika sharin hpawng hta sa du hkaja ai sara/num marai kade rai kun i?
Rev.G.A : : Jahpan bang da ai marai (46), maram hkaja (observer) marai (2) hte rai yang yawng marai (48) rai ma ai.
Bss : : Sharin sara ni marai kade sa du nna, hpabaw gabaw ni hpe madung sharing ai rai kun?
Rev.G.A : : (1) Jaw Jau Laika – Sara Gawlu Seng Awng; (2) Bu Hkawm Laika hte Bible Walk Through – Rev. Dashi Gam Awng; (3) Tara Jahprang Laika – Rev. Nangzing Tu Ja (Ginwang N/T Amu Madu); (4) I & II Htesaloni – Saranum Gawlu Doi Bu; (5) Kasa Laika – Sara Lawdan Zau Nan; (6) Hebre – Rev. Labya De (Ginwang Amu Madu) ni re.
Bss: : Ndai “Build” sharin ai lam hpe kadai ni woi hpang dat ai rai kun?
Rev.G.A : : Anhte mungdan de gaw K.B.C kaw nna matut mahkai let, America na Steve Larson woi hpang ai rai sai. Manmaw Ginwang hta gaw, first core group, Rev.Labya De; Rev.Nangzing Tu Ja hte Saranum Gawlu Doi Bu ni shang lawm, second core group hta Rev.Dashi Gam Awng, Sara Gawlu Seng Awng, Sara Lawdan Zau Nan ni sharin la rai nhtawm Ginwang kata bai sharin ya ai lam rai nga ai.
Bss : : Sharin ladat hte seng nna gaw gara hku rai kun i?
Rev. G.A : : “Chyum Laika hpe madung hti sawk ai ladat” rai nna, kadai ka ai, galoi ka ai, kadai hpe, gara kaw, hpa majaw ka ai, ngu ai (5) W hte How to apply this day ngu ai (H), ndai hku gabaw shaw nna hti sawk ai ladat re.
Bss: : Ya du hkra Chyum Laika gabaw gade hti sawk lu sai kun i?
Rev.G.A.: : Yawng, daini du hkra rai yang Laika (21) du sai.
Bss : : Chyum laika na gabaw ni ngut ai hpang, kaning re gabaw ni naw jawm hkaja na hkyen da ai kun?
Rev.G.A : : Chyum ga na gabaw ni hku sa wa na re; ga shadawn, Mawshe a Tara laika(5),Kasa Pawlu a Shagun laika ni, Kabu Gara Shiga laika ni,Israela ni a Makam masham labau zawn re ni hku nna sa wa na re.
Bss : : Sharin ai lam hta n-gun lu nga ai kun? (sh) Myit da ai ram n-gun n lu ai kun?
Rev.G.A. : : Grai n-gun lu ai. Maning hkan marai (30) jan re kaw nay a dai ning gaw marai (48) du wa ai gaw awng dang lam re.
Bss : ; Ndai “Build” Chyum laika sharin ai lam gaw K.B. C shingwang ting na Ginwang shagu bung hkat ai kun?
Rev. G.A.: : K.B.C shingwang ting hta sharin nga ga ai rai tim, shaning shagu Ginwang ni tinang a lamang hku sharin sa wa ai re.
Bss : : KBC kata hta gaw bai jawm jahkrum jahkrup ai lam nga ai kun i?
Rev.G.A.: : First core group hte second core group alumna nig aw KBC Rung e bai hkrum zup nna gara hku bai sharin sa wan a hpe jawm bawngban, n-gun la ai lam nga ai.
Bss : : Shaning shagu Ginwang kata na Buga Hpung woi, magam gun ni hpe sharin hpawng galaw ya ai lam nga ai kun?
Rev,G.A.: : Laning mi hta (2) lang nga ai. Sara , saranum ni hpe kalang, hpungtau ni hpe kalang re. Hpungtau ni a sharin hpawng gaw Manmaw, Ebyu Buga Hpung e ndai du wa na August (11 – 28) laman galaw nna, Ginwang kata na hpungtau marai (44) sa du sharin la na lam nga ai.
Bss: : Manmaw Ginwang kata Buga gade nga ai kun?
Rev.G.A.: : Manmaw Ginwang hta Buga Hpung (38) nga ai, Laksan ginra Wa Ra Bum hte rai yang (39) re.
Bss: : Ya jahtum hku nna Sara Kaba kaw na laika hti Hpung masha ni hpe jaw mayu ai aga kumhpa langai dang chyeju the naw tsun ya rit.
Rev.G.A : : “Masha gaw muk hte sha asak hkrung ai n re, Karai Kasang a mungga hte asak hkrung ra ai re majaw mungkan masha ni yawng Chyum Laika mungga hpe sung sung, dam dam sawk hti, hkaja chye chyang nna tatut hkan nang hkan sa galu kaba wa ga” ngu nna htet mayu ai.
Bss: : Yan a zawn myit galu kaba hte htai ya ai Sara Kaba hpe anhte Bum Sumshi shiga dap kaw nna grai chyeju dum ga ai law ; grai chyeju kaba sai.
J.W. Ginru Ginsa hte Labau
Sawk hkrunlam hta lawm ai
Htunghking Salang langai mi a kraw hkrat ga si ni
June 13, 2008.
BSS Myitsu wa a mying, nga shara, hte
magam lit hpe shachyen ya rit.
T.J Mying gaw Lashi Tu Ja re. Muse mare,Dingda
lawk kaw nga ai. Ya gaw Muse Jinghpaw Wunpawng Htunghking hte Laili laika
Hpung, Ramma Komiti Amu Madu lit hpe gunhpai nga nngai.
BSS J.W. Ginru ginsa hte Labau Sawk hkrunlam
hpe galoi e hkawm nna gara ginra hkan wa du sagawn da ai rai kun?
T.J Hkrunlam gaw 2007 ning May shata (16)
ya kawn May shata (27) ya shani du hkra rai nna, Yunan mungdaw, Kun Ming Labau
madun gawk, Yunan Labau madun gawk, Shi Jai Shan na Jiwa ni a Lupwa kawng,
Yi amyusha ni a mare daju,Chu Xiung, Be amyusha ni a mare daju, Dali, Na Hkyi
amyusha ni a mare daju, Li Jiang, Tibet amyusha ni nga ai, Shang Grila mungdaw,
De Hkyin mare, Bau Shau Labau madun gawk,Gauri Kawng hku nna Htin Shung, Mangshi
de bai gayin du wa ga ai.
BSS Ndai hkrunlam hta W.P. myusha ni hte
seng ai labau shang langrung langrai ni wa mu lu ai kun?
T.J Grai mu lu ai hku re.
BSS Madun gawk ni hta laklai ai lam kaning
re wa mu lu ai kun i?
T.J. Yunan hte Kun Ming Labau madun gawk
(2) yan hta Shi Jai Shan Lupwa kawng e htu shaw ai, Dan Hkawseng prat na magri
Da-u hta manau maka mu lu ai; bai nna magri hte galaw ai ndan lashawng ni,
ninghkyi, ninghtu, ningri laknak ni, magri chyingtawt hte nga garep hpe yu
nna nta shachyaw da ai, moi na jinghpaw nta hkrang ni hpe mung mu da lu ai.
Nat jaw jau ai kumla hkrang ni hpe mung magri hte tawk ka da ai hpe mu lu
ai re.
Chu Xiung na madun gawk e gaw magri hte galaw ai ningri hta manau maka kap
ai; manau maka shakap da ai chyingtawt, bai nna kazu maka kap ai, Yi amyusha
ni a rid a maka ni hpe wa mu lu ai sha n-ga,Yi myusha ni tsun shaga ai ga
hte anhte W.P. Zaiwa ga grai wa ni nga ai lam ni hpe mu lu ai.
Dali na madun gawk e mu lu ai kaw, AD 738 ning hta Tang dynasty na hkawhkam
wa kaw na Jinghpaw Wunpawng ni Dali mare hpe up na ahkang jaw sai hte , hkawhkam
ban (22) rai yang shaning 318 ning up lu ai lam, dai hta Mungshe Zau, Mungsun
Zau, Dintang Zau, Shalang Zau, Lang Hkung Zau, Yeshi Zau, Mungji Zau, Wuma
Zau ni gaw Wunpawng amyu sha share ni re ngu Miwa Professor marai (4) madi
madun da ai hpe wa mu lu ai.
Yunan madun gawk e mu kau da ai magri Da-u hte magri Chyingtawt ni hpe Dali
Labau madun gawk e mung bai wa mu lu ai. Bai Dali mare kata na lam ni hpe
shamying lang ai hta, "Chyang Lang lam", Me Khong hka hpe "Lang
Chang" ngu shamying ai lam ni wa mu lu ai. Dali hkaw dingsa na deng (10)
jan tsan ai kaw "Lang Hkung" ngu ai Lhaovo mare dingsa hpe wa mu
lu ai.
Lijiang mare na hkawhkam wang hta mu lu ai, Na Hkyi myusha ni a ka hkrang gaw anhte Wunpawng sha ni a "Kaji byu" ai hte raw rai nna, shanhte a dumsa, jaiwa kaba langai hte hkrum jahta yu yang anhte Wunpawng sha ni ga hte shanhte a ga tsawmra bung nga ai lam, matsaw ningtsa de lung ai Jan lahkang, hte shanhte lang nga ai sumla laika hta shanhte a shawng de lai magang sai hpushawng hpuba ni mung laika lu ga ai raitim,dai laika hpe ju,shapyaw sha kau ai lam ka da ai hpe wa mu chye lu ai.
Dehkyin mare e gaw, dai mare na Asuya Uphkang Salang ni hte Tibet htunghking
hte labau ningbaw wa rai nna hkrum jahta lu ai hta, Shang Grila mungdaw gaw
amyusha law law nga lai yu wa ai lambraw shara re lam, "kawng","hkaraw","nga"
ngu ai shanhte a ga wa, anhte ga hte raw re matut mahkai nga ai lam, shanhte
a hkawhkam,"Sha-dan Pung-zau" gaw Wunpawng labau hta lawm ai, Shadan
Pungzam mi rai kun? ngu myit la mai nga ai. Bai nna shanhte a num sa, sharing
shakau ai lam, htawngka ka manawt ai lam ni mung anhte hte grai bung nga ai
hpe mu lu ai.
Bau Shan madun gawk hta gaw Kazu maka kap ai magri chyingtawt ni, Nlung hta
nan tawk ka da ai manau maka ni, majan simsa myithkrum manau sumla ni hpe
wa mu lu ai. Bai nna anhte a rida maka ni hpe mung wa mu lu ai. Ndai madun
gawk hkan madun da ai magri chyingtawt ni hpe Myen mung, Kan Pai Ti hte Miwa
mung Htin Shung mare hkan na htu shaw la lu ai re lam chye lu ai.
Manmaw ga na Gauri Krung de Jiwa ni re n yu wa yang, Tibet hte bum dun ai,
Majoi Bum dung, Gauri Kawng e shawng nga lai wa sai sha n-ga, daini du hkra
myusha ni naw nga nga ai kaw wa du da lu sai.
BSS Ndai hkrunlam hta marai kade
shanglawm nna kadai woi awn, hkawm sa ai rai kun?
T.J. Mawdaw gawt ya ai myitsu (2) hte rai yang
, yawng marai (10) rai ga ai. Bai nna ndai hkrunlam hpe Du kaba Manam Tawng
(Mangshi) woi awn nna, Rev. Maran Ja Gun (Myitkyina),Salang Nhkum Naw Tawng
(Loije),Salang Labang Gam(Shwili),Salang Dashi Gan Maw(Shwili),Sara Maran
Brang Di(Laiza),Sara Tangbau Dau Gyung (Nshawn) ni lawm ai re.
BSS Ndai hkrunlam e mu lu ai labau sakse ni hpe
mahta nna ka da ai labau laika buk ni pru wa na kun i?
T.J. Labau Laika pru wa na matu hkyen lajang
da ai lam gaw nga mali ai. Ja Gumhpraw n-gun hta hkan nna lawan na hte langwi
na lam sha rai na re.
BSS Ndai hkrunlam hta hkan mu lu ai lam ni a
majaw myit hta gara hku hkamsha ai kun i?
T.J. Jiwoi Jiwa ni a matsun maroi, maumwi ga
hpe manu n shadan hkrup ai majaw myit malai lu ai.Ya gaw labau sawk na aten
grai hpang hkrat sai ngu hkam sha ai; bai nna Sinpraw e labau galu dik ai
hte jaiwa lu ai amyu re hpe wa shadan na gaw anhte nan rai sai ngu hkamsha
ai. N myit mada ai ndai hkrunlam kaw sumla mazing hku nna shang lawm lu ai
majaw mung, ndai hkrunlam byin tai lu na matu Ja gumhpraw lit la ya ai, Sut
Du Nhkum Naw Tawng hpe mung yawng a malai chyeju dum nga nngai.
BSS Ya matut nna laika hti shawa hpe htet mayu
ai,tsundan mayu ai lam ni hpe mung naw tsun ya rit.
T.J. Ya ndai Ginru ginsa hte Labau sawk hkrunlam
hta lawm ai Sara Kaba ni hte Salang nig aw prat tup laili laika hte sawk sagawn
hkaja ai myit masin hta arang gawde da ai gaw sakkung maga de rai wa sai,
shanhte myit makun da ai lam ni hpe hkrang shapraw sa wa lu na lam hta daini
na prat ram ramma ni, hpaji ninghkring ni,hte arang lu ai sut du ni law law
a karum madi shadaw lam mung grai ra ahkyak nga ai hpe mu lu nga ai.Dai majaw
anhte a ngangkang ai labau hte mungkan e danhkung ai amyu langai hku tsap
sa wa lu na gaw Jinghpaw Wunpawng amyu sha langai hkrai hte Uhpung Uhpawng
ni yawng a lit kaba re ngu htet mayu ai.
BSS Yan a zawn myit galu kaba hte htai ya ai
majaw nachying wa chyeju dum ga ai.
T.J. Ngai mung myit hta hkamsha nga ai lam ni
hpe tsun dan lu ai majaw grai kabu nngai law.
Bss
Labau, Htunghking, Rida maka, Buhpun sumli, Sumroi, Maumwi, Likit, Ginsup, Gaw sharawt, Nanghpam jasan, Nagis tsinyam, San-htai, Numshawn,