WUNPONG JINGHPO GINRU GINSA
MANAU JAIWA

Sok ka ai: Htoi Man

YUNNAN AMYU LAIKA LAJANG DAP
GA HPO

Wunpong Jinghpo amyu sha ni a ginru ginsa kunghpan hpaji hparat hpe n shamat kau ai hta n-ga. Wunpong Jinghpo amyu sha ji nban yong chye ton lu matu. (Wunpong Jinghpaw Ginru Ginsa Manau Jaiwa) ndai hpe ka lajang, dip shapro dat sai.
Ndai (Wunpong Ginru Ginsa Manau Jaiwa) go, Sakhkung Mungdo Ta-hko Ginwang Shadan Krung Wuhpra Gahtong na Jaiwa gaba Kumhtoi Gam Joi mi n re.

Ka lajang wa ai shaloi, Jaiwa ga hpe go majoi mi n mai ka galai kau, shing nrai nmai kram galai kau ai re majo,Jaiwa wa gara hku tsun yang gara hku ka la jang mat wa ai re. Ga bo nkau mi hpe sha, hti manai ginghka n yak, htai la loi rai na matu ka jai bang ai lam nga ai.
Ndai manau jaiwa ga go moi jiwoi jiwa ni bonu atsam hpe sha kam nna, n-gup aga hte prat mi hte prat mi rai masing sumhting yu wa ai re majo, jaiwa langai hte langai, shing n rai shara hte shara jaiwa ai lamloili shai nga ai. Ndai zon re mang hkang lam hpe byin mai ai daram shabung ninghtan mat wa na matu mung, gaga jaiwa ni hte jahkrup yu na n loi nga ai rai nna, ndai laika hta nhkum ntsup ai lam no nga na re hpe hkam let htom hpang de gaga jai ni lo malo hte jahkrup sharai la nhtawm, jahtum e hkum tsup nna jet ai "Wunpong Jinghpo ginru ginsa chyum gindai buk" byin tai wa lu na lam hpe maddung dat nna yi-ngam sharot dat ai lam sha re.

Ndai (Wunpong Ginru Ginsa - Manau Jaiwa ) hpe sok sagon na matu hte sok sagon wa ai shaloi n-gun atsam jo ai, sara ma Marip Tang (Hpautsen Tong) Myit Hkrum Dhi Laika Dip na matu myitrum manang ni, bai nna laika ndai shapro lu na matu n-gun atsam gaba dat garum ai Yinnan Amyu Laika Lajang Dap na Hkop myitsu ni myitrum manang ni hpe grai chyeju dum dat nngai.
Ka lajang ai wa a hpaji madang nyem ai majo Grau nna ga moi na ga dingsa ni hpe n chye n chyang ai lam lo ai rai nna, kalajang wa ai lam hta shut shai ning-ra ai shara grai rong na re hpe, hkop myitsu salang ni, sara wusa ni, myitrum manang ni ko nna, hpang de grau hkrak ai hku ka sharai lajang lu na matu hpaji la na hpe grai myit kam dat nngai lo.

Htoi Man
1981 ning shata 8 nhtoi 8 ya

---

SUMSING LAMU HTE GINDING GA NAI
NNAN LAT WA AI LAM

GINDING GA NAI HTE SUMSING LAMU NNA LAT WA AI LAM

Amoi Ginding ga nai ngu ai rai n ngai ,
Simsing lamu ngu ai rai n pra yang,
Hpri Ninghpra la ngu ai mi nga,
Mi Ningma Majan ngu ai mi pra .
Mahto la ngu ai mi nga,
Dingshan Majan ngu ai mi pra ;
Machyang la ngu ai mi nga,
Hpunlap Majan ngu ai mi pra ;
Wushi la ngu ai mi pra ,
Wushi la ngu ai mi nga ;
Htauji la ngu ai mi nga,
Htaulang Majan ngu ai mi pra .
Hto de Ningwam la ngu ai mi nga,
Le de Ningpan Majan ngu ai mi pra .
Amoi Ningwam la yan yang ,
Ningpan Majan ko wa jon nga ai ;
Amoi Ningwam la lat yang ,
Ningpan Majan hta wa mat nga ai .

NINGWAM LA HTE NINGPAN MAJAN SHANGAI AI LAM

Amao Ningwam la shangai ,
Ningpan Majan zinghkai yang ;
Malan in man ai mi nga ,
Tangrong in san ai mi pra.
Hpa re ta nga?
Gawa Ningwam la e wunchyen amying shamying yang ,
Ganu Ningpan Majan e noigong magyep shading yang :
Ndai go yat e ,
Hpan Wa Ningsang nga yang ,
Chye Wa Ningchyang pra yang ,
Hpan Wa Ningsang wa lung ,
Malan Ting-rong ga lo.
Amoi Ningwam la shangai,

Ningpan Majan zinghkai yang :
Shi lam Sumri mi nga ,
Hkun lam Sumdai mi pra .
Hpa re ta nga?
Gawa Ningwam la e wunchyen amying shamying ,
Ganu Nigpan Majan e noigong magyep shading yang :
Ndai go Malan ga shangang na shi lam Sumri re ,
Ting-rong ga shakang na hkun lam Sumdai re .
Malan ga hta wai ,
Ting-rong ga hta kai .
Amoi Ningwam la shangai ,
Ningpan Majan zinghkai yang ,
Hpa re ta nga?
Gawwa Ningwam la e wunchyen amying shamying ,
Ganu Ningpan Majan e noigong magyep shading yang ;
Ndai go shi lam lajum mayon ,

Hkun lam laika shabon re lo .
Shi lam laijum mayon gadai lang?
Hkun lam laika shabon gadai dang?
Shi lam laijum mayon lang na yat nga ,
Hkum lam laika shabon na yat pra .

Amoi Ningwam la shangai ,
Ningpan Majan Zinghkai yang ;
Hkitung in myitsu ginla ai mi nga ,
Hkriwang in wa tu shaga ai mi pra ;
Du shayat ai mi nga ,
Man wunhpat ai mi nga .
Man wumhpat ai mi nga ,
lago goiwat ai mi nga .
Hpa re ta nga?
Shi a wunchyen amying shi dai shamying la ,
Noigong magyep shi hkrai shading la;
"Ngai go shi lam laijum mayon lang na ,
Hkun lam laika shabon dang na ,
Hpan wa Ningsang Chye Wa Ningchyang rai nngai lo!" nga ai.
Hpan Wa Ningsang lang na,
Chye Wa Ningchyang dang na ,
Shi lam laijum mayon mi nga ,

Hkum lam laika shabon mi da ya sai .
Hpan Wa Ningsang Chye wa Ningchyang go ,
Shi lam laijum mayon dai lang ,
Hkum lam laika shabon dai dang sai
Malan ga wa lung nit .
Ting-rong ga wa dung htit rai sai .
"Awa Ningwam la e ,
Anu Ningpan Majan e ,
Shangai lau yan myit ,
Zinghkai lau hpyan sit !
Wunchye n amying ngai shamying ya na ,
Noigong magyep ngai shading ya na .

Amoi Ningwam la shangai ,
Ningpan Majan zinghkai yang :
Waren Gumhtung ngu ai mi nga ,
Ningmau Hpa-jeng ngu ai mi pra .
Hpa re ta nga?
Hpan Wa Ningsang Chye Wa Ningchyang e ,
Wunchyen amying shamying ,
Noigong magyep shading yang ;
Ndai go shangai gumngoi na ,
Ningmau hpa-jeng re ;

Ndai go shangai do-lan ,
Zinhkai da-hpran na ,
Waren Gumhtung re lo .

Amoi Ningwam la shangai ,
Ningpan Majan zinghkai yang ;
Ning lum Kumhtong mi nga ,
Ningtsing Wa- grang mi da .
Hpa re ta nga?
Hpan Wa Ningsang Chye Wa Ningchyang e ,
Wunchyen amying shamying ,
Noigong magyep shading yang ;
Ndai go yat e ,
Jan Shinglang ngu ai nga yang ,
Shata ninghprang ngu ai pra yang ,
Ajan ningja n ja
Shata ningja shaja ,
Ajan ningja shaja ,
Ninglum Kumhtong galu ;
Shata ningja shapra ,

Gatsi Wa-grang gapru na Ninglum Kumhtong ,
Ningtsi Wa-grang re lo,
Amoi Ningwam La shangai,
Ningpan Majan zinghkai yang :
Jan Shinglang mi nga ,
Shata Ninghprang mi pra .
Amoi Jan Shinlang mi nga yang ,
Shata Ninghprang mi pra yang ,
Ajan ningja n ja ,
Shata ningja n pra yang ,
Jan ningja shaja na Ninglum Kumhtong mi nga ,
Shata ningja shapra na Ningtsi Wa-grang mi da sai lo .

Amoi Ningwam la shangai ,
Ningpan Majan zinghkai yang ,
Hpa re ta nga?
Hpan wa Ningsang Chye Wa Ningchyang e ,
Wunchyen amying shamying ,
Noigong magep shading yang :
Ndai go yat e ,
Lamu Shinglang ngu ai nga yang ,
GaNinghprang ngu ai pra yang ,
Lamu Ninghprang ngu n kung ,
Ga Ningahprang hkalung yang ,
Lamu Shinglang Shaja ,
Ga Ninghprang shapra na ,
Jan Shinglang re lo ,
Shata Ninghprang re lo ,

Amoi Ningwam la shangai ,
Ningpan Majan zinghkai yang :
Zamon in man ai mi nga .
Ginding in san mi pra .
Hpa re ta nga?
Hpan Wa Ningsang Chye Wa Ningchyang e ,
Wunchyen amying shamying ,
Noigong magyep shading yang ,
Ndai go lamu Shinglang ,
Ga Ninghprang re lo ,
Lamu Shinglang wa hkalung ,
Ga Ninghprang wa n kung nga ai lo ,
Gabye yang mung non non nga ,
Hkom yang mung non non nga ,

Lamu Shinglang shaja na ,
Ga Ninghprang shaja na ,
Jan Shinglang nga sai ,
Shata Ninghprang pra sai ,
Lamu Shinglang hpe Jan Shinglang e gaten shaja ,
Ga Nin ghprang hpe shata Ninghprang e ,
shajen shaja sai .
Lamu Shinglang wa pra wa ,
Ga Ninghprang wa ja sai da .
Hkom yang mung ting ting nga ,
Gabye yang mung kring kring nga sai da .

Amoi lamu Shinglang wa gadai n rin ,
Ga Ninghprang wa gadai n sin ,
Lamu Shinglang wa nau rin ,
Ga Ninghprang wa nau tsin nga ai lo .
"Awa Ningwam la e ,
Anu Ningpan Majan e ,
Lamu Shinglang rin na ,
Ga Ninghprang sin na no shangai u lo ."

Amoi Ningwam La shangai ,
Ningpan Majan zinghkai yang :
Galang Ninghprang ngu ai mi nga ,
Kahka Ninghprang ngu ai mi nga ,
Lapu Ninghprang ngu ai mi nga ,
Sharo Ninghprang ngu ai mi pra :

Magui Ninghprang ngu ai mi nga ,
Manag Shinlang ngu ai mi pra sai .
Lamu Shinglang rin na ya nga ,
Ga Ninghprang sin na ya pra sai lo,
Lamu Shinglang wa dai rai lum wa ,
Ga Ninghprang wa dai rai hkum wa sai da .
Lamu Shinglang dai rai lat gaba wa ,
Ga Ninghprang dai rai pat zinghka wa sai da .
lamu Ngaulen lamun yu wa ,
Ga Ngaulen latsa pru wa sai da .
Mada dam n dap gaba wa ,
Sat sa nhkap zinghka wa sai da lo .

Amoi Ningwam la shangai ,
Ningpan Majan zinghkai yang :
Mahkam in man ai mi nga,
Da-lim in san ai mi pra ,
Hpa re ta nga ?
Hpan Wa Ningsang Chye Wa Ningchang e ,
Wunchyen amying shamying ,
Noigong magyep shading yang :
Ndai go lamu Hpo-rung , Ga Da-Kung re.
Lamu Shinglang hta ra ,

Ga Ninghprang hta hkra di nu ai da .
Shaloi malan ningtsang yang ,
Prang numda hprang rai sai da,
Lamu Hpo-rung lamun yu wa ,
Ga Da-kung latsa pru wa sai da .

Amoi Ningwam la shangai ,
Ningpan Majan zinghkai yang :
Ninghkong numproi prep re mi nga ,
Nau na numroi yep re mi pra :
Sin yang sin ai yang ,
Htoi yang htoi ai hprang re mi nga .
Hpa re ta nga ?
Hpan Wa Ningsang Chye Wa Ningchyaang e ,
Wunchyen amying shamying ,
Noigong magyep shading yang:
Ndai go Wa-nang Ninghtoi la ,
Ningsin Numroi Majan re lo.

Amoi Wa-nang Ninghtoi la go ,
Htoi yang htoi ai hprang rai na nga ;
Ningsin Numroi Majan go,
Sin yang sin ai yang rai na nga ;
Hpan Wa Ningsang Chye Wa Ningchyang e tsun ai ;
"Wa-nang Ninghtoi la e ,
Htoi yang loi mi di u !
Ningsin Numroi Majan e ,
Sin yang loi mi di u !"
Wa-nang ninghtoi lado dat ya ,
Wa-nang ningsin lahkam shalat ya
Wa-nang Ninghtoi la go ,

Htoi yang loi mi di :
Ningsin Numroi Majan go ,
Sin yang loi mi di sai da .
Wa-nang ninghtoi shanang chye wa ,
Wa-nang ningsin lahkam denp chye masai da .

Amoi Wa-nang Ninghtoi la go ,
Ningsin Numroi Majan go ,
Wa-nangnumnon n lu ,
Numroi numpyon n lu ,
"Awa Ningwam la e ,
Anu Ningpan Majan e ,
Wa-nang Ninghtoi la a .
Wa-nang numnon no shangai u lo ,
Ningsin Numroi Majan a ,
Numroi numpyon no zinghkai u lo ,"

Amoi Ningwam la shangai ,
Ningpan Majan zinghkai yang ,
Machyang Kagyin mi nga ,
Gyinchyang Kagyin mi pra ,
Gyinwong Kagyin mi nga ,
Hkakrik Lashong mi nga ;
Kadon Htoirong mi nga ,
Hkakrik Sumnung mi pra ,
Kadon Htoilung mi nga ,
Manam Chyingma mi pra ,
Gaang sen Lapu mi pra ,
Sanyen Dabru mi pra ,
Shuri Lasho mi nga ,
Gaba Shukong mi pra ;
Shulat Lasho mi nga ,
Gaba Shudung mi pra ,
Uyum Uyai mi nga ,
Hpatsip Hpatsai mi pra ;
Ningngun Mairen mi nga ,

Galang Langa mi pra ;
Wunpyen Wunpa Wunru Wunra Madu Sanga mi nga ,
Ninghku Woiso mi pra da .
Wa-nang Ninghtoi la a ;
Wa-nang numnon ya num ;
Ningsin Numroi Majan a ,
Numroi numpyo ya lu sai !
Wa-nang Ninghtoi la go ,
Wa-nang numnon ya lu sai ,
Ningsin Numroi Majan go ,
Ningroi numpyon ya su sai .
Wa-nang numnon nang na ni ,
Wa-nang ninghti maga de sem rai myit !
Ningsin numroi numpyon na ni ,
Wa-nang ningsin maga de hkrem rai myit !

Amoi Hpan Wa Ningsang Chye Wa Ningchyang e ,
Ningwam La hpe tsun ai ;
"Awa Ningwam la e ,
Anu Ningpan Majan e ,
Shangai no ring ,
Zinghkai no hkring sit !"

---

WA-NANG NINGHTOI LA THE NINGSIN NUMROI MAJAW BAI SHANGAI AI LAM

Wa-nang Ninghtoi La go: "Awa Ningwam La a, Shangai dinglen ro shangai na." Ningsin Numroi Majan go:"Anu Ningpan Majan a,Zinghkai lahtong chyo rai na."nga sai da.
Amoi Wa-nang Ninghtoi La shangai,Ningsin Numroi Majan zinghkai yang: Ningsin Numroi Majan zinghkai yang: Ran ran in man ai mi nga, Hpun myi in san ai mi pra. Hpa re ta nga? Hpanwa Ningsang Chye Wa Ningchyang e, Wunchyen amying shamying, Noigong magyep shading yang:Ndai go Jahpyi Lunglam ga re. Jahpyi Lunglam ga hpe e, Lamu Ninghrang ko ro, Ga Shinglang ko chyo di nu ai da. Jahpyi ga wa lat gaba wa, Lunglam ga wa pat zinghka wa sai da. Lamu Ngaulen lamun yu wa, Ga gaulen ntsa pru wa sai da . Mada dam n dap, Sat sa n hkap zinghka wa sai da. Amoi Jahpyi ga wa nau rin, Lunglam ga wa nau tsin ai da. "Wa-nang Ninghtoi La e, Ningsin Numroi Majan e, Jahpyi ga rin na no shangai, Lunglam ga sin na no zinghkai u!"
Amoi Wa-nang Ninghtoi La shangai, Ningsin Numroi Majan zinghkai yang: Amyi go hkrok re mi nga, Aman go dok re mi pra. Hpare ta nga? Hpan Wa Ningsang Chye Wa Ningchyang e, Wunchyen amying shamying, Noigong magyep shading yang: Ndai go Hahpyi ga rin, Lunglam ga sin na, Woishin ganu, Woidong madu re.

Amoi Wa-nang Ninghtoi La shangai, Ningsin Numroi Majan zinghkai yang: Amyi Hkrok re mi nga, Aman go dok re mi pra. Hpa re ta nga? Hpan Wa Ningsang Chye Wa Ningchyang e,Wunchyen amying shamying, Noigong magyep shading yang: Ndai go Jahpyi ga rin, Lunglam ga sin na, Sharung ganu, Shara madu re. Ade Shitzang wunmong ninghton na, Langzang shagong ningpon na re.
Amoi Wa-nang Ninghtoi La shangai, Ningsin Numroi Majan zinghkai yang: Amyi go hkrok re mi nga, Aman go dok re mi pra; Shingyim sot re mi nga, Mashang hkok re mi pra. Hpa re ta nga? Hpan Wa Ningsang Chye Wa Ningchyang e, Wunchyen amying shamying, Noigong magyep shading yang: Ndai go Jahpyi ga rin, Lunglam ga sin na. Graute ganu, Grau wang madu re. Ade Wubung shagong shalum, Wubang wunmong shanum na re. Jahpyi ga sin na ya nga, Lunglam ga rin na ya pra sai Jahpyi ga wa dai rai lum wa, Lunglam ga wa dai num wa sai da .
Amoi Wa-nang Ninghtoi La shangai, Ningsin Numroi Majan zinghkai yang: Ginding in man ai mi nga, Shingkra in san ai mi pra. Hpa re ta nga? Hpan Wa Ningsang Chye Wa Ningchyang e, Wunchyen amying shamying, Noigong magyep shding yang: Ndai go shangai sharing, Zinghkai jahpring na, Shangai shalong zinghkai jahpong na, Shangai Lungbyen , Zinghkai Chyinghkyen re lo. "Wa-nang Ninghtoi La e, Ningsin Numroi Majan e, Shangai Lungbyen ya nga, Zinghkai Chyinghkyen ya pra sai lo. Wa-nang Ninghtoi La e, Ningsin Numroi Majan e, Shangai Lungbyen n ing ing lau shangai it! Zinghkai Chyinghkyen n hpring hpring lau zinghkai sit!"

Amoi Wa-nang Ninghtoi La shangai, Ningsin Numroi Majan zinghkai yang: Tsanem ni man ai mi nga, Numjai in san ai mi pra. Hpa re ta nga? Hpng Wa Ningsang Chye Wa Ningchyang e, Wunchyen amying shamying, Noigong magyep shading yang: Ndai go Tsanem mali, Numjai ga re. Ade Shingtung wa ring na, Shinggm wa chying na; Shingtung shingna ga, Shinggam wa jinghta na ga re.
Amoi Wa-nang Ninghtoi La shangai, Ningsin Numroi Najan zinghkai yang: Machyang yung re mi nga, Shingni tung re mi pra. Hpa re ta nag? Hpan Wa Ningsang Chye Wa Ningchyang e, Wunchyen amying shamying, Noigong magyep shading yang: Ndai go sinpro yon Mu nga Maro, Sinna hkon ga ja Dinghko; Sinpro yon Lingla Maro,Sinna hkon ning-yi dinghko re.

Amoi Wa-nang Ninghtoi La shangai, Ningsin Numroi Majan zinghkai yang: Machyangyung re mi nga, Shingni tung re mi pra. Hpa re ta nga? Hpan Wa Ningsang Chye Wa Ningchyang e, Wunchyen amying shamying, Noigong magyep shading yang: Ndai go ade, Ginli lahkum myin ai mi nga , Ginsang Tingnyang krin ai mi pra yang , Ginsang tingnyang makoi na, Magyeng Ahku Shingram Ahku re. Ade Ginli tu ding myi moi ai mi nga, Ginsang ga kring Myi moi ai mi pra yang, Awa nga inMyihkoi ai mi nga yang, Ginli lahkum bai sho , Magyeng Ahku Shingram Ahku re lo.
Amoi Wanang Ninghtoi La shangai, Ningsin Numroi Majan zinghkai yang: machyang yung re mi nga, Shingni tung re mi pra. Hpare ta nga? Hpan Wa Ningsang Chye Wa Ningchyang e, Wunchyen amying shamying, Noigong magyep shading yang: Ndai go Lamu Lupson, Ningtsang Kungdon re. Ade Daru Gumsan nga yang, Magam Gunhpan pra yang, Daru Gumsan mayoi, Magam Gunhpan makoi na Lamu Lupson re, Ningtsang Kungdon re lo.

Amoi Wa-nang Ninghtoi La shangai, Ningsin Numroi Majan zinghkai yang: Ninghkong Numproi prep re mi nga, Nau na Numroi yep re mi pra. Hpa re ta nga? Hpan Wa Ningsang Chyi Wa ningchyang e, Wunchyen amying ahamying, Noigong magyep shading yang:Ndai go Lamu Pyilan, Sintung Usan re. Ade lamu Ningnam nga yang, Ga Ningnam pra yang, Lamu Ningnam gawan, Ga Ningnam gatsan na, Lamu Pyilan Sintung Usan re.
Amoi Wa-nang Ninghtoi La shangai, Ningsin Numroi Mauan zinghkai yang: Ninghkong Numproi prep re mi nga, Nau na numroi yep re mi pra. Hpa re ta nga? Hpan Wa Ningsang Chye Wa Ningchyang e, Wunchyen amying shamying, Noigong magyep shading yang: Ndai go lanung la, lanung Majan re lo.

---

 

 

Ningpawt de

 

Labau, Htunghking, Rida maka, Buhpun sumli, Sumroi, Maumwi, Likit, Ginsup, Gaw sharawt, Nanghpam jasan, Nagis tsinyam, San-htai, Numshawn,